Չինաստանում ստեղծված Photon Matrix սարքը, ինչպես պնդվում է, ի զորու է հայտնաբերել մոծակին, գնահատել նրանից ունեցած հեռավորությունը, իսկ հետո լազերով խոցել թիրախը։ Եվ այս ամենը՝ երեք միլիվայրկյանում։

Նոր գաջեթն ունակ է վայրկյանում ոչնչացնել մինչև 30 մոծակ, հայտնում է Naked Science-ը։

Բացի այդ, սարքն օգտագործում է միլիմետրային ռադար՝ տեսադաշտը սկանավորելու և խոշոր օբյեկտներ, ինչպիսիք են մարդիկ և ընտանի կենդանիները, հայտնաբերելու համար։ Եթե դրանք հայտնաբերվեն, ապա մոծակներին ոչնչացնելու լազերը չի գործարկվի։

Սարքն ի զորու չէ հայտնաբերել այն միջատներին, որոնք թռչում են վայրկյանում մեկ մետրից ավելի արագությամբ։ Ուստի այն հարմար չէ այնպիսի վնասատուների դեմ օգտագործելու համար, ինչպիսիք են ճանճերը։

Սնուցումը տեղի է ունենում վարդակի կամ լրացուցիչ լիցքավորվող արտաքին մարտկոցի միջոցով։ Մեկ լիցքավորումը պետք է բավականացնի ութ կամ 16 ժամ օգտագործման համար՝ կախված ընտրված մոդելից։