Նախընտրելի
Չինաստանը հաստատել է իր պատրաստակամությունը Հարավարևելյան Ասիայի միջուկային զենքից զերծ գոտու մասին պայմանագրին միանալուն, հենց որ բոլոր անհրաժեշտ ձևականությունները կատարվեն, հայտարարել է Մալայզիայի արտաքին գործերի նախարար Մոհամադ Հասանը, հաղորդում է Reuters-ը։
Հարավարևելյան Ասիայի միջուկային զենքից զերծ գոտու մասին պայմանագիրը (SEANWFZ) ուժի մեջ է 1997 թվականից և սահմանափակում է տարածաշրջանի երկրների կողմից միջուկային էներգիայի օգտագործումը բացառապես խաղաղ նպատակներով, ինչպիսին է էլեկտրաէներգիայի արտադրությունը։
ԱՍԵԱՆ-ի նպատակն է ապահովել, որ աշխարհի բոլոր միջուկային տերությունները, այդ թվում՝ Չինաստանը, ԱՄՆ-ն, Մեծ Բրիտանիան, Ռուսաստանը և Ֆրանսիան, ստորագրեն պայմանագրի արձանագրությունը և պաշտոնապես պարտավորվեն չտեղակայել կամ չտեղափոխել միջուկային զենք տարածաշրջանում, ներառյալ բացառիկ տնտեսական գոտիները և մայրցամաքային շելֆը։
«Չինաստանը վերահաստատել է իր պատրաստակամությունը՝ առանց որևէ վերապահման ստորագրել պայմանագիրը», - լրագրողներին ասել է Հասանը ԱՍԵԱՆ-ի արտաքին գործերի նախարարների և գործընկերների հանդիպման շրջանակներում։
Չինաստանի արտաքին գործերի նախարարությունը նաև հայտարարել է, որ Պեկինը սերտ կապի մեջ է ԱՍԵԱՆ-ի պետությունների հետ արձանագրության ստորագրման հարցում։ «Չինաստանը միշտ վճռականորեն աջակցել է Հարավարևելյան Ասիայում միջուկային զենքից զերծ գոտու ստեղծմանը և բազմիցս արտահայտել է իր պատրաստակամությունը՝ պայմանագրի արձանագրությունը առաջինը ստորագրելու վերաբերյալ», - Պեկինում կայացած ճեպազրույցի ժամանակ ասել է Չինաստանի արտաքին գործերի նախարարության խոսնակ Մաո Նինգը։
Այս շաբաթ Չինաստանի արտաքին գործերի նախարար Վան Ին գտնվում է Կուալա Լումպուրում, որտեղ մասնակցում է ԱՍԵԱՆ-ի իր գործընկերների հետ հանդիպումներին։
