Եվրոպական հանձնաժողովի նախագահ Ուրսուլա ֆոն դեր Լեյենը հինգշաբթի օրը պահպանել է իր պաշտոնը՝ չնայած անվստահության քվեարկությանը, որը հիմնականում նախաձեռնել են ծայրահեղ աջ Եվրախորհրդարանի պատգամավորները: Նրանք մեղադրել են նրա թիմին «անօրինական գործողությունների» միջոցով ԵՄ-ի նկատմամբ վստահությունը խաթարելու մեջ:

Ինչպես և սպասվում էր, առաջարկը չի հավաքել անհրաժեշտ ձայների երկու երրորդը:

Առաջարկի հիմնական նախաձեռնողը ռումինացի ազգայնական Գեորգե Պիպերեան է եղել, որը, ի թիվս այլ բաների, քննադատել է Հանձնաժողովի կողմից COVID-19 համավարակի գագաթնակետին ֆոն դեր Լեյենի նամակագրությունը Pfizer-ի գործադիր տնօրենի հետ հրապարակելուց հրաժարվելը:

«Որոշումների կայացումը դարձել է անթափանցիկ և կամայական, ինչը մտահոգություններ է առաջացնում չարաշահումների և կոռուպցիայի վերաբերյալ: ԵՄ-ի կողմից պարտադրված բյուրոկրատիան, ինչպիսին է կլիմայի փոփոխության դեմ պայքարը, չափազանց թանկ է», - երկուշաբթի օրը խորհրդարանին ասել է Պիպերեան:

Քննարկման ընթացքում ֆոն դեր Լեյենը պաշտպանել է իր գործունեությունը, ընդգծելով, որ համավարակի ընթացքում իր մոտեցումը ապահովել է պատվաստանյութերի հավասար հասանելիություն ԵՄ բոլոր երկրների համար և մերժելով անարդյունավետության մեղադրանքները:

Չնայած սկզբում անվստահության քվեարկության հաջողության հավանականությունը քիչ է եղել, սակայն այն քաղաքական մարտահրավեր  ստեղծել ֆոն դեր Լեյենի համար, հատկապես այն պատճառով, որ Եվրոպական հանձնաժողովը բանակցություններ է վարել Թրամփի վարչակազմի հետ՝ եվրոպական ապրանքների վրա ԱՄՆ բարձր մաքսատուրքերը կանխելու համար։

Սա 2014 թվականից ի վեր առաջին դեպքն է եղել, երբ Եվրոպական հանձնաժողովի նախագահը բախվեց անվստահության քվեարկության, որը նույնպես չի օգնել Ժան-Կլոդ Յունկերի հեռացմանը։