ԵՄ-ն կարող է մաքսատուրքեր սահմանել ամերիկյան ավտոմեքենաների, Boeing ինքնաթիռների և բուրբոնի նկատմամբ։ Այս մասին գրում է Bloomberg գործակալությունը՝ հղում անելով Եվրահանձնաժողովի 206 էջանոց փաստաթղթին։

Եվրահանձնաժողովը ԵՄ երկրներին է ներկայացրել ԱՄՆ-ից 72 միլիարդ եվրո ընդհանուր արժողությամբ ապրանքների ցանկ՝ առևտրային սակագներ սահմանելու համար, որն արվել է ի պատասխան ԱՄՆ-ի որոշման, ըստ որի օգոստոսի 1-ից ԵՄ-ից ամբողջ արտահանման վրա կկիրառվեն 30% մաքսատուրքեր։ Սա ապրանքների երկրորդ ցանկն է, որոնց նկատմամբ ԵՄ-ն կարող է մաքսատուրքեր սահմանել։ 21 միլիարդ եվրո արժողությամբ առաջին փաթեթը Եվրահանձնաժողովը հաստատել է դեռ գարնանը՝ ի պատասխան ԱՄՆ-ի կողմից ԵՄ-ից պողպատի և ալյումինի վրա 10%-անոց մաքսատուրքերի սահմանման։ Սակայն Եվրամիությունը դեռևս հետաձգել է դրանց կիրառումը՝ հույս ունենալով ԱՄՆ-ի հետ պայմանավորվածություն ձեռք բերել բոլոր մաքսատուրքերը չեղարկելու վերաբերյալ, մինչդեռ ԵՄ-ից պողպատի և ալյումինի վրա ամերիկյան մաքսատուրքերը շարունակում են գործել։

Ըստ Bloomberg-ի տվյալների՝ լրացուցիչ մաքսատուրքերի ցանկը ներառում է մեքենաշինության արտադրանք, քիմիական նյութեր, պլաստմասսաներ, բժշկական սարքեր, էլեկտրական սարքավորումներ, գինիներ և այլ գյուղատնտեսական ապրանքներ։ Ցուցակի սկզբնական տարբերակը նախատեսում է 95 միլիարդ եվրոյի մաքսատուրքեր, սակայն ԵՄ անդամ ընկերությունների և երկրների հետ խորհրդակցություններից հետո այն կրճատվել է։ «Ապրանքների ընտրության չափանիշներից մեկը եղել է այլընտրանքային առաջարկի առկայությունը, ինչպես նաև հաշվի է առնվել տեղափոխման չափազանց բարձր արժեքը։ Ներմուծված ռազմական արտադրանքը մաքսատուրքերով չի հարկվի», - գրում է գործակալությունը։