Մալայզիայի Գերագույն կառավարիչ Սուլթան Իբրահիմը պետական այցով ժամանել է Մոսկվա: Ինչպես հաղորդում է ՏԱՍՍ-ի թղթակիցը, նրա ինքնաթիռը՝ ոսկեգույն-կապույտ Boeing 737-ը, թագավորական խորհրդանիշներով, վայրէջք է կատարել Վնուկովո-2 օդանավակայանում։

Մալայզիական լրատվամիջոցների տվյալներով՝ ինքնաթիռի ինտերիերը ստեղծվել է ավիացիայի նկատմամբ իր կրքով հայտնի միապետի անձնական հրամանով: Սուլթան Իբրահիմը, որն ունի օդաչուի լիցենզիա, անձամբ մասնակցում է ինքնաթիռի կառավարմանը: Ինքնաթիռը շահագործվում է 2016 թվականի փետրվարից։

Սուլթան Իբրահիմի այցն ունի պետական այցի կարգավիճակ: Սա Մալայզիայի պետության ղեկավարի առաջին այցն է Ռուսաստան՝ 1967 թվականին ԽՍՀՄ-ի և Մալայզիայի միջև երկկողմ հարաբերությունների հաստատումից ի վեր։

Այցի շրջանակներում, որը կտևի մինչև օգոստոսի 10-ը, սուլթանը օգոստոսի 6-ին բանակցություններ կվարի Ռուսաստանի նախագահ Վլադիմիր Պուտինի հետ։

Մալայզիան դաշնային ընտրովի միապետություն է: Երկրի գերագույն կառավարիչն ընտրվում է հինգ տարի ժամկետով՝ ինը նահանգների սուլթաններից։ 2024 թվականին այդ պաշտոնը զբաղեցրեց Ջոհորի սուլթան Իբրահիմ իբն Սուլթան Իսկանդարը։