Հնագետները Եգիպտոսում հայտնաբերել են հազվագյուտ ամբողջական կոթող, որի վրա առկա է «Կանոպոսի դեկրետը»՝ արքայական հրովարտակ, որը թվագրվում է մոտավորապես մ.թ.ա. 238 թվականով: Այս մասին գրում է Interesting Engineering-ը՝ նշելով, դա տեքստի առաջին ամբողջական օրինակն է, որը հայտնաբերվել է 150 տարվա ընթացքում։

Այն հայտնաբերվել է Թել ալ-Ֆարաին հնագիտական վայրում, որը գտնվում է Նեղոսի դելտայի արևելքում՝ Շարկիա մարզի ալ-Հուսեյնիա քաղաքում։

Կոթողը պատրաստված է ավազաքարից և գրեթե ամբողջությամբ պատված է հիերոգլիֆներով (ի տարբերություն Կանոպոսի դեկրետների մյուս տարբերակների, որոնք սովորաբար ներկայացվում են երեք գրերով՝ հիերոգլիֆներով, դեմոտիկ և հունարեն)։ Հայտնագործության չափերն են՝ բարձրությունը՝ մոտ 1,27 մ, լայնությունը՝ մոտ 0,84 մ, հաստությունը՝ մոտ 0,48 մ։

«Կանոպոսի դեկրետը» հրապարակվել է Պտղոմեոս III Էվերգետես թագավորի կողմից՝ Կանոպոսում քրմերի հետ խորհրդակցելուց հետո՝ ի պատիվ թագավորի, Բերենիկե II թագուհու և նրանց դստեր։ Հրամանագիրը նշում էր տաճարներին տրված առատաձեռն նվիրատվությունները, բարեփոխումները, նոր կրոնական և վարչական գործառույթների, ինչպես նաև օրացուցային կանոնների ներմուծումը, ինչպիսին էր, օրինակ, յուրաքանչյուր չորս տարին մեկ նահանջ օրվա ավելացումը։ Փաստաթուղթը արտացոլում է Պտղոմեոսյան Եգիպտոսում կրոնի, պետական կառավարման և իշխանության գաղափարախոսության միջև սերտ կապը։

Կոթողի հայտնաբերման վայրը՝ Թել ալ-Ֆարաինը, Եգիպտոսի Միջին Թագավորության դարաշրջանից ի վեր եղել է կարևոր կրոնական և վարչական կենտրոն։ Այս վայրում հնագիտական պեղումներն արդեն ցույց են տվել տաճարներ, ազնվականների տներ և այլ կարևոր կառույցներ։ Նոր հայտնագործությունն ընդլայնում է այն պատկերացումը, թե ինչպես են Պտղոմեոսի վարչական իշխանությունն ու պաշտամունքային կյանքը միահյուսվել Նեղոսի դելտայում, և ինչպիսին է եղել մշակութային ու կրոնական կյանքը հունա-եգիպտական դինաստիայի օրոք։