Նախընտրելի
ԱՄՆ նախագահ Դոնալդ Թրամփը երկուշաբթի օրը սպառնացել է օգտագործել արտակարգ լիազորությունները ապստամբների դեմ՝ երկրի տարբեր քաղաքներում դեմոկրատների կողմից ղեկավարվող քաղաքներ ավելի շատ զորքեր ուղարկելու համար։ Այդ կերպ նա ուժեղացնում է իր հռետորաբանությունը, քանի որ բանակը մոբիլիզացնելու նրա փորձերը իրավական մարտահրավերների են բախվում, հաղորդում է AFP-ն։
Նա բացահայտորեն քննարկում էր Ապստամբության մասին օրենքի կիրառման հնարավորությունը այն բանից հետո, երբ Օրեգոնի դաշնային դատավորը ժամանակավորապես կասեցրել է Փորթլենդում Ազգային գվարդիայի տեղակայումը, մինչդեռ Իլինոյսի մեկ այլ դատավոր թույլատրել է նմանատիպ միջոցներ կիրառել Չիկագոյում։ Երկու քաղաքներում էլ դաշնային գործակալների ներհոսք է նկատվել՝ որպես զանգվածային արտաքսումների Թրամփի արշավի մաս, ինչը բողոքի ակցիաներ է առաջացրել ներգաղթի ծառայությունների շենքերի մոտ։
«Մենք հենց այնպես չէ, որ Ապստամբության մասին օրենքն ունենք։ Եթե ես ստիպված լինեի այն կիրառել, ես դա կանեի,– լրագրողներին ասել է Թրամփը Օվալաձև աշխատասենյակում։ – Եթե մարդկանց սպանեին, իսկ դատարանները խանգարեին մեզ, կամ նահանգապետերը, կամ քաղաքապետերը խանգարեին մեզ, ես, իհարկե, այդպես կվարվեի»։ Իլինոյսի պաշտոնյաները հայց էին ներկայացրել՝ փորձելով արգելափակել զորքերի տեղակայումը Չիկագոյում, սակայն դատավոր Էյփրիլ Փերին, ով նշանակվել էր Թրամփի դեմոկրատ նախորդ Ջո Բայդենի կողմից, հրաժարվել էր անհապաղ կերպով ժամանակավոր արգելքի որոշում տալ։
Նա գործի լիարժեք լսումը նշանակել է հինգշաբթի օրը և կառավարությունից խնդրել է տեղեկացնել դատարանին՝ լրացուցիչ տեղեկատվություն տրամադրելու մասին։
Բանավեճը բռնկվել է այն բանից հետո, երբ հայտնի է դարձել, որ հանրապապետականների կողմից ղեկավարվող Տեխասը ծրագրում է 200 Ազգային գվարդիայի զինծառայող ուղարկել Իլինոյս, ինչը զայրացրել է դեմոկրատ նահանգապետ Ջեյ Բի Փրիցկերին։
«Նրանք պետք է հեռու մնան Իլինոյսից»,– հայտարարել է Փրիցկերը։
Նա նաև մեղադրեց Չիկագոյում խուզարկություններ իրականացնող դաշնային ներգաղթային գործակալներին «բանդիտիզմի», «չափազանցված ուժ» կիրառելու և ԱՄՆ քաղաքացիներին անօրինական կերպով կալանավորելու մեջ։
Անցյալ շաբաթավերջին Թրամփը թույլատրել էր Ազգային գվարդիայի 700 զինծառայողների տեղակայումը Չիկագոյում, չնայած դեմոկրատական կուսակցության ընտրված առաջնորդների, այդ թվում՝ Փրիցկերի և քաղաքապետի դիմադրությանը։ Իրենց հայցում նահանգի գլխավոր դատախազ Կվամե Ռաուլը և Չիկագոյի փաստաբանը Թրամփին մեղադրել են ամերիկյան զորքերը «իր քաղաքական թշնամիներին պատժելու» համար օգտագործելու մեջ։ Ներքին անվտանգության նախարար Քրիստի Նոյեմը պաշտպանել է զորքերը Չիկագո ուղարկելու ծրագիրը՝ հայտարարելով, որ ԱՄՆ երրորդ ամենամեծ քաղաքը «ռազմական գործողությունների գոտի է»։ Թրամփը Փորթլենդը անվանել է «պատերազմից ավերված», սակայն շրջանային դատավոր Քարին Իմերգութը ժամանակավորապես արգելել է զորքերի տեղակայումն Օրեգոնում՝ ասելով, որ «նախագահի վճռականությունը պարզապես կապված չէ փաստերի հետ»։ Թրամփի վարչակազմը բողոքարկելու է այս որոշումը, հայտնել են Սպիտակ տնից։ Կիրակի օրը հրապարակված CBS-ի հարցումը ցույց է տվել, որ ամերիկացիների 58 տոկոսը դեմ է ԱՄՆ քաղաքներում Ազգային գվարդիայի տեղակայմանը։ Իլինոյսը և Օրեգոնը առաջին նահանգները չեն, որոնք դատական հայցեր են ներկայացրել Թրամփի վարչակազմի կողմից Ազգային գվարդիայի տեղակայման դեմ։ Կալիֆոռնիան հայց է ներկայացրել այն բանից հետո, երբ այս տարվա սկզբին Թրամփը զորքեր էր ուղարկել Լոս Անջելես՝ ապօրինի միգրանտների դեմ բռնաճնշումներով պայմանավորված բողոքի ցույցերը ճնշելու համար և այդ գործը դեռ դատարաններում է։
