նախընտրելի դարձնելՌուսաստանի զբոսաշրջային հնագույն գործակալություններից մեկը` «Լանտա-տուր վոյաժը», «քաշել է» իր հաճախորդներին: Ընկերությունը սնանկացել է, իսկ ռուսական զբոսաշրջիկներն էլ մնացել են աշխարհի տարբեր օդանավակայաններում, քանի որ նրանց թռիչքները չեն վճարվել:
Հունվարի 27-ին «Լանտա-տուր վոյաժն» իր գործընկերներին նամակով տեղեկացրել է իրավիճակի մասին, տեղեկությունը հայտնվել է նաեւ ընկերության կայքում: Facebookից եւ «Վկոնտակտե»-ից տուրիստական գործակալության էջերը ջնջվել են:
Տուժած զբոսաշրջիկների թիվը կարող է գերազանցել 8 հազարը:
Շերեմետյեւոյում եւ Դոմոդեդովոյում մնացած հաճախորդները տուրիստական գործակալությունից թերթիկներ են ստացել, որում ասվել է, որ «թռիչքը հետաձգվել է տեխնիկական պատճառներով»: Բոլորն էլ մտադիր են բարոյական եւ նյութական փոխհատուցում պահանջել դատարանի միջոցով: «Լանտա-տուր վոյաժն» ապահովագրված է «Ինգոսստախ» ընկերությունում` 100 միլիոն ռուբլու չափով:
«Լանտա-տուր վոյաժ» ընկերությունն ունի 20 տարվա պատմություն: Այն հիմնականում զբոսաշրջություններ է կազմակերպել դեպի Չեխիա, Ֆրանսիա, Իտալիա, Հարավարեւելյան Ասիա, ԱՄՆ, բազմիցս եղել է տուրիզմի բնագավառում մրցանակների դափնեկիր: Դեռեւս ընկերության սնանկացման մասին պաշտոնական հայտարարություն չի արվել, ենթադրվում է , որ այն կհրապարակվի հունվարի 30-ին, գրում է gazeta.ru-ն:
