Թուրքիան, հավանաբար, կհեռացվի Գազայի հատվածի կայունացնող ուժերի կազմից․ The Guardian

Թուրքիան հայտարարել է, որ պատրաստ է զորքեր տրամադրել, սակայն Իսրայելը հասկացրել է, որ չի հավանություն տալիս գործողության ժամանակ թուրքական զորքերի մասնակցությանը։ Իսրայելի և Թուրքիայի միջև լարվածությունը աճել է Սիրիայի պատճառով և իսրայելական կառավարությունը Թուրքիայի նախագահ Ռեջեփ Թայիփ Էրդողանին համարում է չափազանց մոտ «Մուսուլման եղբայրներին» և հենց ՀԱՄԱՍ-ին։ Սակայն Թուրքիային կայունացման ուժերի կազմից բացառելը կլիներ վիճահարույց, քանի որ այն ԱՄՆ նախագահ Դոնալդ Թրամփի 20 կետանոց հրադադարի համաձայնագրի երաշխավորներից մեկն է և համարվում է առավել մարտունակ մուսուլմանական զինված ուժերից մեկը։

Փոխարենը, այն կկոորդինացնի իր գործողությունները ԱՄՆ գլխավորած ռազմական բջիջի հետ, որը հայտնի է որպես Քաղաքացիական-Ռազմական Համակարգման Կենտրոն (ՔՌՀԿ) և որի բազան գտնվում է Իսրայելի հարավային քաղաք Կիրյաթ Գաթում։ Այս խումբը, որի կազմում ընդգրկված են Մեծ Բրիտանիայից, Ֆրանսիայից, Հորդանանից և Էմիրություններից ոչ մեծ թվով խորհրդատուներ, ստեղծվել է երեքշաբթի օրը ԱՄՆ փոխնախագահ Ջեյ Դի Վենսի կողմից։ Կենտրոնն, ըստ ամենայնի, ստանձնում է նաև Գազայում օգնության համակարգողի դերը, թեև հիմնական անցակետերը շարունակում են փակ մնալ։

Ուժերի առջև դրված կլինի ՀԱՄԱՍ-ը զինաթափելու և անցումային պաղեստինյան կառավարության անվտանգությունն ապահովելու խնդիրը, որի ձևավորման հարցը դեռևս մնում է չլուծված։ Իսրայելի վարչապետ Բենյամին Նեթանյահուն բացառել է Պաղեստինի ինքնավարության մասնակցությունը Գազայի հատվածի հետպատերազմյան զարգացմանը, թեև ուրբաթ օրը հիմնական պաղեստինյան խմբավորումները համաձայնության են եկել, որ անկախ տեխնոկրատների կոմիտեն իր վրա կվերցնի հատվածի կառավարումը։