Բեյրութ այցելած ԱՄՆ ֆինանսների նախարարության պատվիրակությունը պահանջել է, որ Լիբանանի իշխանություններն ուժեղացնեն փողերի լվացման դեմ պայքարի միջոցառումները և սահմանափակեն շիական «Հեզբոլլահ» կազմակերպության ֆինանսական աղբյուրները: Ըստ համաարաբական «Asharq al Awsat» թերթի՝ ԱՄՆ պատվիրակությունը գլխավորում է Ազգային անվտանգության խորհրդի ահաբեկչության դեմ պայքարի ավագ տնօրեն Սեբաստիան Գորկան:

Հանրապետության նախագահ Ժոզեֆ Աունի հետ հանդիպմանը նա հայտարարել է 2025 թվականի վերջին «Հեզբոլլահի» ֆինանսավորման բոլոր ուղիները փակելու անհրաժեշտության մասին։ «Սա առաջնահերթ խնդիր է և այն պետք է լուծվի շիական ջոկատների զինաթափման գործընթացի հետ միևնույն ժամանակ, որով հիմա զբաղվում է լիբանանյան բանակը,- մատնանշել է ամերիկացի պաշտոնյան, որի խոսքերը մեջբերում է պարբերականը։ - Մենք պետք է վերացնենք «Հեզբոլլահ»-ի կողմից իր ռազմական ենթակառուցվածքները վերականգնելու համար օգտագործվող կանխիկ տնտեսությունը»։

Ի պատասխան՝ Աունն ընդգծել է, որ Լիբանանը «խստորեն պահպանում է փողերի լվացումը, մաքսանենգությունը և ահաբեկչության ֆինանսավորման համար միջոցների օգտագործումը կանխելու համար սահմանված ընթացակարգերը»։ Նա իր հերթին կոչ է արել ԱՄՆ-ին դադարեցնել Իսրայելի կողմից ագրեսիվ գործողությունների սրացումը, ինչը կարող է նպաստել «Լիբանանյան բանակի տեղակայման ավարտին Լիտանի գետից հարավ՝ իր վրա դրված առաքելությունը կատարելու համար»։

Ամերիկյան պատվիրակության կազմում, որը երկուշաբթի օրը բանակցություններ է վարել վարչապետ Նավաֆ Սալամի և նրա կաբինետի անդամների հետ, ընդգրկված է Ֆինանսների նախարարի՝ ահաբեկչության ֆինանսավորման դեմ պայքարի և ֆինանսական հետախուզության գծով տեղակալ Ջոն Հյոռլին։ Նոյեմբերի 7-ին Fox News հեռուստաալիքին տված հարցազրույցում նա տվյալներ է բերել, ըստ որոնց՝ 2025 թվականի հունվարից Իրանի Իսլամական հեղափոխության պահապանների կորպուսը (ԶՈւ էլիտար ստորաբաժանումները) 1 միլիարդ դոլար է փոխանցել «Հեզբոլլահին», հիմնականում դրամական փոխանցումներով զբաղվող ընկերությունների ցանցի միջոցով։