նախընտրելի դարձնել
Հարավային Կորեայի կառավարությունը չի նախատեսում թշնամական գործողություններ իրականացնել Հյուսիսային Կորեայի դեմ։ Այս մասին հայտարարել են հարավկորեական առաջնորդի վարչակազմից։
«Մեր կառավարությունը մտադրություն չունի անտագոնիստական դիմակայություն վարել Հյուսիսի հետ։ Կառավարությունը հետևողականորեն ջանքեր է գործադրում միջկորեական հարաբերություններում լարվածությունը նվազեցնելու և վստահությունը վերականգնելու համար», - ասել է վարչակազմի պաշտոնական ներկայացուցիչ Կան Յու Ջոնգը։
Նա հավելել է, որ Կորեայի Հանրապետությունը կհամագործակցի ԱՄՆ-ի հետ անվտանգության ոլորտում, քանի որ դա օգնում է պաշտպանել երկրի շահերը։ «Եվ այսուհետ էլ նախատեսում ենք բոլոր ջանքերը գործադրել, որպեսզի Կորեայի Հանրապետության և ԱՄՆ-ի դաշինքը նպաստի Կորեական թերակղզում խաղաղության և կայունության ապահովմանը», - հավելել է նա։
Ավելի վաղ Կորեայի կենտրոնական լրատվական գործակալությունը մեկնաբանություն էր հրապարակել, որում նշվում էր, որ Կորեայի Հանրապետության և Միացյալ Նահանգների միջև հարաբերությունները հավասար և փոխշահավետ դաշինք չեն։ Կորեայի Ժողովրդական Հանրապետության լրագրողները նույնպես նշել էին, որ Հյուսիսային Կորեայի ապամիջուկայնացման վերաբերյալ Կորեայի Հանրապետության և Միացյալ Նահանգների ցանկությունը նշանակում է Փհենյանի հետ բախման թշնամական ընթացք և երկրի սահմանադրության ժխտում։ Նրանց խոսքով՝ Վաշինգտոնի և Սեուլի բազմաթիվ զորավարժություններն ու հռետորաբանությունը հաստատում են, որ Միացյալ Նահանգները և Կորեայի Հանրապետությունը Հյուսիսային Կորեայի հետ բախումն ընտրել են որպես իրենց դաշինքի հիմնական ուղղություն։
Կորեայի Հանրապետության պաշտպանության նախարարությունը առաջարկել է ռազմական բանակցություններ սկսել Հյուսիսային Կորեայի հետ սահմանային խախտումներից խուսափելու համար, քանի որ 1953 թվականից ի վեր օգտագործվող սահմանային նշաններից շատերը վնասված են կամ վատ տեսանելի։ Ամռանը Հարավային Կորեայի նախագահ Լի Ջե-մյոնը հրամայել է դադարեցնել Հյուսիսային Կորեայի բնակիչներին ուղղված քարոզչություն հեռարձակող սահմանային բարձրախոսների աշխատանքը։
