ԱՄՆ նախկին նախագահ Ջոն Քենեդու թոռնուհին հայտնել է, որ իր մոտ քաղցկեղի ագրեսիվ տեսակ է ախտորոշվել․ 35-ամյա կինը հայտարարել է, որ իրեն մեկ տարուց պակաս կյանք է մնացել։
ԱՄՆ նախկին դեսպան Քերոլայն Քենեդու դուստրը՝ Տատյանա Շլոսբերգը, այդ մասին գրել է շաբաթ օրը The New Yorker-ում հրապարակված էսսեում՝ իր պապի սպանության 62-րդ տարելիցի օրը։
Երկու երեխաների մայրը՝ կլիմայական հարցերով լրագրողը, կտրականապես դեմ էր նախագահ Դոնալդ Թրամփի օրոք իր ազգական Ռոբերտ Քենեդի կրտսերի՝ ԱՄՆ առողջապահության նախարարի պաշտոնում նշանակմանը։
Իր էսսեում Շլոսբերգը նկարագրում է իր տագնապը՝ պայմանավորված այդ պաշտոնում իր ազգականի հաստատմամբ, այն ժամանակ, երբ ինքը պայքարում էր հիվանդության դեմ։
Ըստ Շլոսբերգի «Պայքար իմ արյան դեմ» էսսեի, 2024 թվականի մայիսին՝ ծննդաբերությունից հետո, նրա մոտ ախտորոշվել է սուր միելոիդային լեյկոզ։
Չնայած բուժմանը, որը ներառում էր ոսկրածուծի փոխպատվաստում և քիմիաթերապիա, նա նշում է, որ բժիշկների վկայությամբ, արդյունքները հուսադրող չեն։
«Վերջին կլինիկական փորձարկման ժամանակ բժիշկս ասաց, որ կկարողանա կյանքս պահպանել, հնարավոր է, մեկ տարի, - գրում է նա։ - Առաջին միտքս այն էր, որ երեխաներս, որոնց դեմքերը մշտապես կոպերիս տակ են, ինձ չեն հիշի»։
Շլոսբերգի որդին ծնվել է 2022 թվականին, իսկ դուստրը՝ 2024-ին։ Շլոսբերգը, որի քեռին՝ Ջոն Քենեդի կրտսերը, զոհվել է ավիավթարից 38 տարեկանում, իսկ տատիկը՝ Ժաքլին Քենեդի Օնասիսը, մահացել է քաղցկեղից, երբ Շլոսբերգը դեռ շատ փոքր էր, պատմում է նաև այն ցավի մասին, որ իր մահը կպատճառի մորը։ Նշենք, որ վերջինս նախկինում զբաղեցրել է Ավստրալիայում և Ճապոնիայում ԱՄՆ դեսպանի պաշտոնը։
Ավելի վաղ՝ այս ամիս, նրա եղբայրը՝ Ջեք Շլոսբերգը, հայտարարել էր Նյու Յորքից Կոնգրեսում առաջադրվելու մտադրության մասին։ Շաբաթ օրը նա համացանցում հրապարակել է քրոջ էսսեն՝ «Կյանքը կարճ է, բաց մի՛ թող այն» մակագրությամբ։
նախընտրելի դարձնել
