ԱՄՆ Վաշինգտոն նահանգում գետերի մակարդակը բարձրացրած և մայրուղիներում սողանքներ առաջացրած ուժեղ անձրևների պատճառով հինգշաբթի արտակարգ դրություն է հայտարարվել, հաղորդում է Associated Press-ը։

Տասնյակ հազարավոր բնակիչների հրամայվել է տարհանվել։ Նահանգի որոշ շրջաններում շարունակվել են ուժեղ անձրևները, ինչը հանգեցրել է գետերի մակարդակի բարձրացման, ճանապարհների փակման, ջրային փրկարարական աշխատանքների և Սիեթլի ու Վանկուվերի միջև Amtrak ծառայության դադարեցման։

Անձրևներն ուժգնացել են Վաշինգտոնի Կասկադ լեռների մի քանի շրջաններում, որտեղ 24 ժամվա ընթացքում շուրջ 15,2 սանտիմետր անձրև է տեղացել։

Ազգային օդերևութաբանական ծառայության տվյալներով՝ շրջաներից մեկում՝ Սնոքուալմի Փասում, վեց ժամվա ընթացքում լրացուցիչ 4,3 սանտիմետր անձրև է տեղացել։ Արտակարգ իրավիճակների կառավարման պաշտոնյաները բնակիչներին կոչ են արել չանցնել կուտակված ջրի միջով։ Գետերի մոտ ապրողներին խորհուրդ է տրվել պատրաստվել տարհանման։

Օրեր շարունակ անդադար տեղատարափ անձրևներից հետո, նահանգապետ Բոբ Ֆերգյուսոնը չորեքշաբթի երեկոյան նահանգի ամբողջ տարածքում արտակարգ դրություն է հայտարարել՝ զգուշացնելով, որ առաջիկա օրերին «մարդկանց կյանքերը վտանգված կլինեն»։ Բնակիչներից ոմանց արդեն հրահանգվել է տեղափոխվել Սկագիտ շրջանի բարձրադիր վայրեր, որը Սիեթլից հյուսիս գտնվող խոշոր գյուղատնտեսական շրջան է, և Սկագիտ գետի 100-ամյա ջրհեղեղային հովտում գտնվող բոլորին հրահանգվել է տարհանվել։ Շատ շրջաններում հնարավոր են աղետալի ջրհեղեղներ, և նահանգը խնդրում է ջրային փրկարարական խմբեր և նավակներ։

Ազգային գվարդիայի հարյուրավոր զինվորներ կուղարկվեն տեղական համայնքներին օգնելու համար, հայտարարել է Վաշինգտոնի Ազգային գվարդիայի գեներալ-ադյուտանտ Գենտ Ուելշը։