ԱՄՆ պետքարտուղար Մարկո Ռուբիոն Կամպուչիայի վարչապետ Հուն Մանետի հետ հեռախոսազրույցում հայտնել է, որ Վաշինգտոնը պատրաստ է աջակցել Պնոմպենի եւ Բանգկոկի երկխոսությանը մարտական գործողությունների դադարեցման շուրջ։ Այս մասին տեղեկացվել է   ամերիկյան արտաքին քաղաքական գերատեսչության մամուլի ծառայության ղեկավարի տեղակալ Թոմի Պիգոտի գրավոր հայտարարությունում։

Նրա խոսքով՝ Ռուբիոն Հուն Մանետի հետ զրույցում «մտահոգություն է հայտնել Կամպուչիայի եւ Թաիլանդի միջեւ շարունակվող բռնության առիթով»։ Պետքարտուղարը «հաստատել է [ԱՄՆ նախագահ Դոնալդ] Թրամփի խաղաղության ձգտումը եւԿուալա Լումպուրի խաղաղ պայմանավորվածությունների լիակատար իրականացման անհրաժեշտությունը»։ «Պետքարտուղար Ռուբիոն նորից հաստատել է, որ ԱՄՆ-ը պատրաստ է աջակցել բանակցություններին՝ ուղղված խաղաղության եւ կայունության ապահովմանը Կամպուչիայի եւ Թաիլանդի միջեւ»,- ավելացրել է Պիգոտը։

Կամպուչիա-Թաիլանդ սահմանին հրազենային բախումները սկսվել են դեկտեմբերի 7-ին: Դեկտեմբերի 8-ին Թաիլանդի ցամաքային ուժերը հայտնել են, որ կամպուչիական զորքերը սկսել են հրետակոծել սահմանային գոտում գտնվող Թաիլանդի դիրքերը: Ի պատասխան՝ Թաիլանդի ռազմաօդային ուժերը հարձակվել են Կամպուչիայի ռազմական ենթակառուցվածքի վրա: Երկու երկրներում Ռուսաստանի դեսպանատները խորհուրդ են տվել ռուս զբոսաշրջիկներին զերծ մնալ սահմանային գոտիներ այցելելուց: Դեկտեմբերի 12-ին Թրամփը հայտարարել է, որ հեռախոսազրույց է ունեցել Թաիլանդի եւ Կամպուչիայի վարչապետեր Անութհին Չանվիրակունի եւ Հուն Մանետի հետ: Նախագահը վստահեցրել է, որ երկու առաջնորդները համաձայնել են դադարեցնել ռազմական գործողությունները 24 ժամվա ընթացքում եւ վերադառնալ խաղաղության պայմանավորվածությունների կատարմանը: Սակայն դրանից հետո լուրեր են շրջանառվում մարտերի շարունակման մասին:

Այս շաբաթ ավելի վաղ Թաիլանդի արտաքին գործերի նախարարությունը, հղում կատարելով Թաիլանդի պաշտպանության նախարարությանը, հայտնել էր, որ դեկտեմբերի 27-ին կկայանա Թաիլանդի եւԿամպուչիայի սահմանային գլխավոր կոմիտեի բարձր մակարդակի հանդիպում՝ հրադադարի հաստատման վերաբերյալ: Հարավարեւելյան Ասիայի պետությունների ասոցիացիայի երկրները ողջունել են նման ռեժիմ հաստատելու հնարավորության քննարկումների մեկնարկը: