Նախընտրելի
ԱՄՆ նախագահ Դոնալդ Թրամփի վարչակազմը երեքշաբթի օրը հայտարարել է, որ խարդախության վերաբերյալ մտահոգությունների պատճառով՝ դադարեցնում է դեմոկրատների կողմից ղեկավարվող հինգ նահանգներում երեխաներ ունեցող անապահով ընտանիքների աջակցության ծրագրերի ֆինանսավորումը: Այս մասին հայտնում է Associated Press-ը։
Առողջապահության և սոցիալական ծառայությունների նախարարությունը, որը վերահսկում է ծրագիրը, նահանգներից կպահանջի տրամադրել լրացուցիչ փաստաթղթեր՝ միջոցներին հասանելիություն ստանալու համար։
«Ընտանիքները, որոնք ապավինում են երեխաների խնամքի և ընտանեկան օգնության ծրագրերին, արժանի են վստահ լինելու, որ այդ ռեսուրսներն օգտագործվում են օրինական ձևով և ըստ նշանակության», - ասված է առողջապահության փոխնախարար Ջիմ Օ'Նիլի հայտարարության մեջ։
Վարչակազմը չի բացահայտում խարդախության մեղադրանքների վերաբերյալ մանրամասները։ Երեքշաբթի երեկոյան նախարարությունը հայտարարել է, որ «մտահոգություններ է հայտնաբերել այն մասին, որ ԱՄՆ քաղաքացիների և օրինական բնակիչների համար նախատեսված արտոնությունները կարող էին ոչ պատշաճ կերպով տրամադրված լինել այն անձանց, ովքեր դաշնային օրենսդրության համաձայն չունեն դրա իրավունքը»։
Հարվածի տակ են հայտնվել հինգ նահանգներ՝ Կալիֆոռնիան, Կոլորադոն, Իլինոյսը, Մինեսոտան և Նյու Յորքը, և գերատեսչությունը հայտնել է, որ նրանք արդեն ծանուցվել են այդ մասին։ Ավելի վաղ նույն օրը նահանգապետ Քեթի Հոքուլը հայտարարել էր, որ Նյու Յորքը պատրաստ է դատի տալ վարչակազմին, ինչպես դա արդեն տասնյակ անգամներ արել են դեմոկրատների կողմից ղեկավարվող նահանգները։
Ծրագրերն ուղղված են կարիքավոր երեխաներին և նրանց ընտանիքներին օգնություն ցուցաբերելուն։ Թիրախային ծրագրերն օգնում են առավել կարիքավոր ամերիկացիներից ոմանց. «Երեխաների խնամքի և զարգացման հիմնադրամը» սուբսիդավորում է ցերեկային խնամքը ցածր եկամուտ ունեցող ընտանիքների երեխաների համար՝ թույլ տալով ծնողներին աշխատել կամ սովորել։
«Անապահով ընտանիքների ժամանակավոր օգնության ծրագիրը» նախատեսում է դրամական օգնություն և մասնագիտական ուսուցում, որպեսզի աղքատության մեջ ապրող ծնողները կարողանան թույլ տալ իրենց գնել տակդիրներ ու հագուստ և աշխատավարձ ստանալ։ Չափերով շատ ավելի փոքր «Սոցիալական ծառայությունների բլոկային դրամաշնորհների հիմնադրամը» աջակցում է սոցիալական սպասարկման մի քանի տարբեր ծրագրերի։
Թրամփն անձամբ մանրամասներ չի տրամադրել, սակայն երեքշաբթի օրը սոցիալական ցանցերում հայտարարել է. «Կալիֆոռնիայում խարդախության հետաքննությունը սկսված է»։
Կալիֆոռնիայի նահանգապետ Գևին Նյուսոմի մամուլի քարտուղար Տարա Գալյեգոսը հայտարարել է, որ «Դոնալդ Թրամփը անմեղսունակ, երդվյալ ստախոս է, ում հարաբերություններն իրականության հետ ավարտվել են շատ տարիներ առաջ»։ Նա նաև հանդես է եկել ի պաշտպանություն կառավարական ծրագրերում խարդախության դեմ պայքարի Կալիֆոռնիայի ձեռքբերումների։
Նյու Յորք նահանգի դեմոկրատ սենատոր Քիրստեն Ջիլիբրանդը հայտարարել է, որ ֆինանսավորումը դադարեցնելու Թրամփի որոշումն ուղղված է քաղաքական միավորներ վաստակելուն, այլ ոչ թե խարդախությունը կանխելուն։
