Սարանսկում փետրվարի 21-ին, ժամը 10-ի սահմաններում, հրդեհ է բռնկվել արդյունաբերական գոտում։ Ինչպես հայտնել են տարածաշրջանի ԱԻՆ վարչությունից, բռնկումը տեղի է ունեցել Վասենկոյի փողոցում գտնվող Սարանսկի սարքաշինական գործարանի (ՍՍԳ) տարածքում, որն ընդգրկված է ռազմարդյունաբերական համալիրի ձեռնարկությունների ցանկում։ Արտակարգ պատահարի պատճառը չի նշվել։ Հրդեհը տարածվել է ՍՍԳ-ի արտադրամասերից մեկում՝ ընդգրկելով 150 քմ տարածք։ Երկու ժամ անց ԱԻՆ-ը զեկուցել է հրդեհի մեկուսացման մասին և հայտարարել, որ տուժածներ չկան։ «Ստոլիցա Ս» պարբերականը հայտնում է, որ այրվել է ձեռնարկության պահեստը։ Հրդեհի վերաբերյալ այլ պաշտոնական տվյալներ դեռևս չկան։ Իշխանությունները առավոտյան ժամը 7:30-ի սահմաններում հայտնել էին տարածաշրջանում անօդաչուների վտանգի մասին, որը չեղարկվել է ժամը 10:30-ին։ ՌԴ Պաշտպանության նախարարության առավոտյան ամփոփագրում Մորդովիայում դրոնների ոչնչացման մասին չէր հաղորդվում։

Այլ տվյալների համաձայն՝ հրդեհը տեղի է ունեցել «Էլեկտրովիպրյամիտել» ԲԲԸ-ի տարածքում, որը Ռուսաստանի խոշորագույն ձեռնարկություններից է և ուժային էլեկտրոնիկա է արտադրում ՌԴ զինված ուժերի կարիքների համար։ Այս մասին Astra-ին հայտնել են տեղի բնակիչները՝ ենթադրելով, որ գործարանը ենթարկվել է անօդաչուների հարվածի։ Ալիքը նաև վերլուծել է ականատեսների կադրերը, որտեղ երևում է սև ծխի հսկայական սյուն, և եկել է այն եզրահանգման, որ այրվել է հենց «Էլեկտրովիպրյամիտելը»։ Ուկրաինական «Օպերատիվնի ՎՍՈւ» և Exilenova+ ալիքները նույնպես պնդում են, որ հրդեհը բռնկվել է հենց այդ գործարանում։ Ձեռնարկությունն արտադրում է ուղղիչներ, ինվերտորներ, սնուցման աղբյուրներ, փոխակերպիչներ և այլ մասնագիտացված էլեկտրատեխնիկական սարքավորումներ։ Այն գտնվում է ԱՄՆ-ի, Կանադայի, ԵՄ-ի, Մեծ Բրիտանիայի, Շվեյցարիայի, Նոր Զելանդիայի և Ճապոնիայի պատժամիջոցների ներքո՝ ռազմապաշտպանական պետական պատվերներին մասնակցելու համար։

Բաց աղբյուրների համաձայն՝ ձեռնարկությունը լիցենզավորված է «Ռազմական ռեգիստր» համակարգում՝ սպառազինության և ռազմական տեխնիկայի համար ուժային կիսահաղորդչային սարքերի մշակման ու հավաքման համար, ինչպես նաև ունի «Գոսատոմնադզորի» պաշտոնական թույլտվությունը՝ ատոմակայանների համար սարքավորումների նախագծման և արտադրության համար։

Շաբաթ օրը ցերեկը Ուկրաինայի զինված ուժերի անօդաչուները գրոհել են նաև Թաթարստանը։ ԱԹՍ-ների «զանգվածային գրոհի» մասին զեկուցել է Թաթարստանի Ալմետևսկի շրջանի ղեկավար Գյուզել Խաբուտդինովան։ «Արձանագրվել է արտադրական օբյեկտների վրա հարձակման փորձ», - նրա խոսքերն է մեջբերում տեղական վարչակազմի տելեգրամյան ալիքը։

Ալմետևսկի բնակիչները Shot-ին հայտնել են մի քանի պայթյունների մասին։ Astra-ի տվյալներով՝ քաղաքացիները դրոններ են նկատել ալմետևսկյան «Ռադիոպրիբոր» գործարանից 600 մետր հեռավորության վրա, որն էլեկտրոնային համակարգեր է արտադրում ավիացիայի համար։ Ավելի ուշ Խաբուտդինովան հայտարարել է, որ ՀՕՊ ուժերը «չեզոքացրել են» սպառնալիքը։ «Տուժածներ չկան։ Շրջանի օբյեկտներում արտադրական գործընթացները չեն խաթարվել, բոլոր ձեռնարկություններն աշխատում են բնականոն ռեժիմով», - հայտնել է պաշտոնյան։

Անօդաչուներ են խոցվել նաև Ելաբուգայի շրջանի վրա, որտեղ գտնվում է Ուկրաինայի վրա հարձակվող «Գերան» դրոնների խոշորագույն արտադրամասը։ Այս մասին հայտնել է շրջանի ղեկավար Ռուստեմ Նուրիևը։ Նրա տվյալներով՝ «զոհեր և ավերածություններ չկան»։ ՌԴ Պաշտպանության նախարարությունը զեկուցել է հանրապետության երկնքում 11 ԱԹՍ-ի ոչնչացման մասին։