Նախընտրելի
Ավստրալացի տղամարդը սահմանել է անսովոր համաշխարհային ռեկորդ՝ նա առաջին անգամ պապիկ է դարձել 91 տարեկանում։
UPI-ի տվյալներով՝ 91-ամյա Չառլզ Սմիթը պաշտոնապես ընդգրկվել է Գինեսի ռեկորդների գրքում՝ թոռնուհու ծնվելուց հետո։
Երեխայի ծննդյան պահին Սմիթը 91 տարեկան եւ 209 օրական էր, սա էլ համարվել է ռեկորդային։ Նրա թոռնուհին՝ Այլան, ծնվել է նրա որդու եւ հարսի ընտանիքում, ինչը նրան թույլ է տվել առաջին անգամ պապիկ դառնալ այդքան ուշ տարիքում։
Ռեկորդը գրանցվել է Ավստրալիայի Բրիսբեն քաղաքում եւ պաշտոնապես հաստատվել է Գինեսի ռեկորդների փորձագետների կողմից։
Նշվել է, որ նման դեպքերը մանրակրկիտ ստուգվում են՝ հաշվի առնելով երեխայի տարիքը, ընտանեկան կապերը եւ ծննդյան ամսաթիվը հաստատող փաստաթղթերը։
Ռեկորդակրի որդին՝ Էշլի Սմիթը, պատմել է, որ իր հայրը հետաքրքիր է ոչ միայն այն պատճառով, որ առաջին անգամ պապիկ է դարձել այդքան առաջացած տարիքում։
«Իմ հոր մեջ ամենատպավորիչը նրա անկախությունն է»,- նշել է նա։ «Նա հրաշալի ժամանակ է անցկացնում թոշակի անցնելուց հետո՝ ճանապարհորդում է Ավստրալիայում իր քեմփերով եւ ծով է դուրս գալիս Մորտոնի ծոցում։ Տարիքը նրան ընդհանրապես չի խանգարել. կարծում եմ՝ նա հիմա ավելի ակտիվ է, քան երբեւէ։ Նա ունի դրական հայացքներ եւ մտերիմ ընկերների շրջանակ, եւ դա շատ բան է ասում նրա մասին։ Եվ նրան ճանաչելով, նրա խմած թեյի քանակը, հավանաբար, նույնպես դեր է խաղում այս ամենում»։
