Փրկարարական բաճկոնը, որը կրել է Titanic-ի ուղևորուհին խորտակվող շոգենավից փրկարար նավակով հեռանալիս, շաբաթ օրն աճուրդում վաճառվել է 670 000 ֆունտ ստերլինգով (906 000 դոլար), հայտնում է Associated Press-ը։

Բաճկոնը կրել է առաջին կարգի ուղևորուհի Լաուրա Մեյբլ Ֆրանկատելին. դրա վրա ստորագրել են ինքը և նույն փրկարար նավակի մյուս վերապրածները:

Այն դարձել է Արևմտյան Անգլիայի Դեվիզես քաղաքում Henry Aldridge & Son աճուրդի տան կազմակերպած «Հիշատակի իրեր Titanic-ից» աճուրդի գլխավոր լոտը։ Իրը հեռախոսով վաճառվել է անհայտ գնորդի մի գումարով, որը զգալիորեն գերազանցել է 250 000-ից 350 000 ֆունտ ստերլինգ նախնական գնահատականը:

Նույն աճուրդում Titanic-ի փրկարար նավակներից մեկի նստատեղի բարձը 390 000 ֆունտ ստերլինգով (527 000 դոլար) վաճառվել է Թենեսի նահանգի Փիջեն Ֆորջ և Միսուրի նահանգի Բրենսոն քաղաքներում գտնվող Titanic-ի երկու թանգարանների սեփականատերերին։