Գեղարքունիքում հունվարի 26-ին հրազենային վնասվածքից մահացած Արթուր Իրիցյանն ամուսնացած էր, երկու երեխա ուներ: Այս մասին NEWS.am-ին ասաց Լիճքի գյուղապետ Գնել Գրիգորյանը, որի համագյուղացին է սպանված երիտասարդը:
Գյուղապետը նշեց, որ կատարվածը բոլորին է զարմացրել, պատճառների մասին այս խահին խոսելը վաղ է, քանի որ Արթուրն ու սպանության մեջ կասկածվող Արմեն Գորոյանը ընկերներ են եղել:
«Արթուրն էլ, Արմենն էլ արտագնա աշխատանքով էին զբաղվում: Չգիտենք, թե ինչ է տեղի ունեցել նրանց մեջ, հետաքննություն է իրականացվում: Իրար ընկերներ էին, թե վերջին շրջանում ինչ հարաբերություններ են ունեցել, չեմ կարող ասել»,- ասաց գյուղապետը:
Քննչական կոմիտեից էլ մեզ հայտնեցին, որ սպանության մեջ կասկածվող, Լիճք գյուղի բնակիչ Արմեն Գորոյանը այսօր՝ հունվարի 27-ին, վաղ առավոտյան ինքնակամ ներկայացել է ոստիկանություն: Նա ձերբակալված է:
Ավելի վաղ ՀՀ Քննչական կոմիտեն հայտնել էր, որ հունվարի 26-ին՝ ժամը 16:05-ին «Մարտունու ԲԿ» ՓԲԸ-ից ահազանգ է ստացվել, որ նույն օրը «հոգեվարքային վիճակ, հրազենային վնասվածքով» ախտորոշմամբ իրենց մոտ է տեղափոխվել Արթուր Յուրիկի Իրիցյանը, ով հիվանդանոցում գիտակցության չգալով մահացել է: Դեպքի առթիվ ՀՀ քննչական կոմիտեի Գեղարքունիքի մարզային քննչական վարչության Մարտունու քննչական բաժնում հարուցվել է քրեական գործ` ՀՀ քրեական օրենսգրքի 104-րդ հոդվածի 1-ին մասով և 235-րդ հոդվածի 1-ին մասով: Քննությամբ պարզվել է, որ Իրիցյանին հրազենային վնասվածք է պատճառվել Գեղարքունիքի մարզի Լիճք գյուղի սկզբնամասում գտնվող հուշարձանի մոտ: Դեպքի վայրում հայտնաբերվել է 9 մմ տրամաչափի 4 հատ պարկուճ:
