Թուրքիայի Ազգային մեծ ժողովի 26-րդ գումարման ընտրությունների արդյունքում երեք կուսակցություններից ներկայացված հայ թեկնածուները կրկին պատգամավոր են դարձել։

Ստամբուլի 2-րդ ընտրատարածքում «Ժողովրդա-հանրապետական» կուսակցության ընտրացուցակում առաջին հորիզոնականը զբաղեցնող հայազգի Սելինա Դողանը պատգամավոր է վերընտրվել։

Ստամբուլի 2-րդ ընտրատարածքում «Արդարություն եւ զարգացում» կուսակցության ընտրացուցակում 14-րդ հորիզոնականում գտնվող Մարգար Եսայանը նույնպես ընտրվել է։

Ստամբուլի 3-րդ ընտրատարածքում քրդական «Ժողովուրդների դեմոկրատական» կուսակցության ընտրացուցակում  2-րդ տեղը զբաղեցնող Գարո (Կարապետ) Փայլանը կրկին պատգամավոր է դարձել։

Ավելի վաղ NEWS.am-ը հայտնել էր, որ Թուրքական Milliyet-ի փոխանցմամբ՝ ընդհանուր քվեատուփերի 80 տոկոսը հաշվել են, եւ ստացվել է հետեւյալ պատկերը․

«Արդարություն եւ զարգացում» կուսակցություն-49,3 տոկոս,

«Ժողովրդա-հանրապետական» կուսակցություն-25,4 տոկոս,

«Ազգայնական շարժում» կուսակցություն-11,9 տոկոս,

«Ժողովուրդների դեմոկրատական» կուսակցություն-10,9 տոկոս։

Նշենք, որ ընդդիմությունը առարկություններ  է հայտնել բացված քվեատուփերի արդյունքների հետ կապված՝ շեշտելով, թե ավելի քիչ քվեատոփեր են բացվել, քան ներկայացրել ԿԸՀ-ն։