Նախընտրելի
Գերմանիայի Ձախ կուսակցությունը (Die Linke) Բեռլինի ընտրություններում դուրս է եկել առաջին տեղ՝ գրանցելով պատմականորեն բարձր արդյունք, հայտնում է Anadolu-ն։
Նրա ցուցակը գլխավորում է թուրքական ծագում ունեցող թեկնածու Էլիֆ Էրալփը, որը կոալիցիոն կառավարության ձևավորման դեպքում կարող է դառնալ Բեռլինի առաջին ղեկավար բուրգոմիստրը՝ միգրացիոն անցյալով։
ARD-ի վերջին պրոյեկցիայի համաձայն՝ Die Linke-ն ստանում է ձայների 24,9%-ը՝ գրեթե կրկնակի ավելի, քան 2023 թվականի նախորդ ընտրություններում, երբ կուսակցությունը հավաքել էր 12,2%։ Կանցլեր Ֆրիդրիխ Մերցի պահպանողական Քրիստոնեա-դեմոկրատական միությունը (CDU) զբաղեցնում է երկրորդ տեղը՝ 20%-ով։
Այնուհետև գալիս են «Այլընտրանք Գերմանիայի համար» (AfD)-ը՝ 15,7%-ով, «կանաչները»՝ 15%-ով, և Սոցիալ-դեմոկրատական կուսակցությունը (SPD)-ն՝ 11,9%-ով։ Սառա Վագենկնեխտի դաշինքը (BSW) հավաքում է շուրջ 5% և անցնում է երկրամասային խորհրդարան։
«Սիրելի բեռլինցիներ, շնորհակալություն — շնորհակալություն ձեր վստահության համար»,- կիրակի երեկոյան իր կողմնակիցներին ասել է Էրալփը։ Ըստ նրա, արդյունքը պատմական է դարձել, իսկ ընտրողները Die Linke-ին մանդատ են տվել նոր կառավարություն ձևավորելու համար։
Էրալփը ծնվել է Գերմանիայում՝ Թուրքիայից ներգաղթած ընտանիքում։ Նրա ծնողները՝ սոցիալիստներ և արհմիութենական ակտիվիստներ, փախել էին Թուրքիայից 1980 թվականի ռազմական հեղաշրջումից հետո։ Էրալփը իրավաբան է, 2021 թվականից Բեռլինի Ներկայացուցիչների պալատի պատգամավոր և իրավապաշտպան։
Նախընտրական արշավի ընթացքում Էրալփը հղում էր անում Նյու Յորքի քաղաքապետ Զորան Մամդանիի հաջողությանը՝ նրան օրինակ անվանելով այլ երկրների ձախ կուսակցությունների համար։
Նա հայտարարել էր, որ նրա քարոզարշավը կարող է ուղենիշ ծառայել նաև Բեռլինի համար։ Էրալփի քարոզարշավի կենտրոնում սոցիալական անհավասարությունն էր, բնակարանի արժեքը և մայրաքաղաքում կյանքի հասանելիությունը։
Միևնույն ժամանակ, Die Linke-ի առաջին տեղը ինքնին դեռ չի նշանակում կառավարության ավտոմատ ձևավորում. Բեռլինի կառավարության ղեկավարի ընտրության համար անհրաժեշտ կլինի կոալիցիոն համաձայնագիր այլ կուսակցությունների հետ։
