«Ոսկու աշխարհ» առեւտրի կենտրոնի աշխատակից Նելլի Հարությունյանին, որն անհետացել էր այս տարվա օգոստոսին, հայտնաբերել են ողջ եւ առողջ։ NEWS.am-ի աղբյուրների փոխանցմամբ, նրան հայտնաբերել են այսօր՝ նոյեմբերի 2-ին, Երեւանում։
Նելլի Հարությունյանն այս պահին գտնվում է ոստիկանության Կենտրոնականի բաժնում, որտեղ պարզում են նրա անհետացման հանգամանքները։ Ոստիկանությունում մեր տեղեկությունը չհերքեցին։
Հիշեցնենք, որ օգոստոսի 21-ին հաղորդում է ստացվել, որ Նելլի Հարությունյանը նույն օրը՝ ժամը 17:00-ի սահմաններում, դուրս է եկել Երեւան քաղաքի Խորենացի 24 հասցեում գործող «Վաղարշ եւ որդիներ կոնցեռն» ՍՊ ընկերության ոսկու տոնավաճառից, որից հետո նրանից որեւէ տեղեկություն չկա:
Առեւտրի կենտրոնի աշխատակիցները NEWS.am-ի թղթակցի հետ զրույցում հայտնել էին, որ 38-ամյա Նելլի Հարությունյանն օգոստոսի 21–ին իր ունեցած ոսկեղենը ամեն օրվա պես տուն գնալուց առաջ դրել է հատուկ նախատեսված չհրկիզվող պահարանը եւ հեռացել։ Շենքից դուրս գալուց հետո նա անհետացել էր:
Սեպտեմբերի 1-ին քրգործ էր հարուցվել Քրեական օրենսգրքի 110-րդ հոդվածի հատկանիշներով, այն է՝ ինքնասպանության հասցնելը, իսկ սեպտեմբերի 12-ին քրգործը վերաորակվել էր սպանության հոդվածով։ Քրեական գործի նախաքննության ընթացքում հարցաքննվել էին Ն.Հարությունյանի ընտանիքի անդամները, շուրջ մեկ տասնյակից ավելի վկաներ: