Ղարաբաղա-ադրբեջանական հակամարտ զորքերի շփման գծի արեւելյան ուղղության մերձճակատային հատվածում (Ակնա) հակառակորդի առաջապահ ուժերը միջդիրքային տարածքում հրդեհելով չեզոք գոտու խոտածածկույթը՝ նպատակ են ունեցել արցախյան կողմին հասցնել տնտեսական վնաս: Այս մասին այսօր՝ մայիսի 21-ին, NEWS.am-ի հետ զրույցում ասաց ԼՂՀ վարչապետի մամուլի քարտուղար Արտակ Բեգլարյանը:
«Փորձում են տնտեսական վնասներ հասցնել արցախյան կողմին, հատկապես սահմանամերձ շրջանների գյուղացիներն են վնասներ կրում դրանից: Սա ոչ միայն սոցիալական խնդիր է առաջացնում, այլեւ հոգեբանական, քանի որ մարդիկ անընդհատ լարման մեջ են լինում, իսկ մյուս կողմից դատապարտելի է, որ Հայաստանի ու Ադրբեջանի նախագահները հանդիպեցին, կարողացան համաձայնության գալ որոշ կետերի շուրջ, պայմանավորվեցին վստահության կառուցման միջոցների շուրջ եւ դրան հաջորդեցին ոչ միայն հրադադարի խախտումներ, այլեւ նմանատիպ սադրիչ գործողությունները, որոնք վստահության կառուցմանը չեն նպաստում»,-ասաց Արտակ Բեգլարյանը:
Նրա խոսքով, մայիսի 19-ին, հրդեհելով չեզոք գոտու խոտածածկույթը, ադրբեջանական կողմը մեծ վնաս չի հասցրել արցախյան կողմին՝ ժամանակին կարողացել են կանխարգելիչ գործողություններով դադարեցնել հրդեհը. «Մայիսի 19-ից հետո նմանատիպ սադրիչ գործողություն չեն իրականացրել, այժմ մենք կանխարգելիչ քայլեր ենք ձեռնարկում՝ խոտածածկերը վերցվում են հսկողության տակ, որպեսզի անվտանգության գոտիներ ձեւավորվեն»,-ասաց նա:
