Բենզինը թանկացել է հարկային դրույքաչափերի փոփոխության հետեւանքով: Այս մասին NEWS.am-ի հետ զրույցում նշեցին ՀՀ տնտեսական մրցակցության պաշտպանության պետական հանձնաժողովից՝ անդրադառնալով վերջին օրերին բենզինի գնի 10 դրամով թանկացման փաստին:
Նշենք, որ վերջին օրերին հանրապետության բենզալցակայաններում բենզինի գնի աճ է նկատվում: Ռեգուլյար տեսակի բենզինը, որը սպառման ծավալներով ամենամեծն է, թանկացել է 1 լիտրի հաշվով 10 դրամով: Նախկին 370 դրամի փոխարեն այն վաճառվում է 380-ով:
Բենզինի գնի փոփոխության հետ կապված NEWS.am-ի հարցին ի պատասխան ՀՀ Տնտեսական մրցակցության պաշտպանության պետական հանձնաժողովի նախագահի մամուլի քարտուղար Գայանե Սահակյանը պարզաբանեց. «Հանձնաժողովի կողմից գերիշխող դիրք ունեցող ընկերությունների բենզալցակայաններում կատարված դիտանցման տվյալներով 2016 թվականի մայիսի 23-ից բենզինի իրացման մանրածախ գինը 10 դրամով բարձրացել է: Տեղեկացնեմ, որ բենզինի մանրածախ գնի բարձրացումը հիմնականում պայմանավորված է «Ակցիզային հարկի մասին» ՀՀ օրենքում կատարված փոփոխություններով: Մասնավորապես «Ակցիզային հարկի մասին» ՀՀ օրենքի 5-րդ հոդվածի 6-րդ կետի համաձայն, եթե նախկինում բենզինի ներմուծման դեպքում 1 տոննայի համար գանձվող ակցիզային հարկի եւ ավելացված արժեքի հարկի հանրագումարը պետք է կազմեր նվազագույնը 112 000 ՀՀ դրամ, ապա օրենսդրական նոր փոփոխությունից հետո, 2016 թվականի մայիս 1-ից ներմուծված բենզինի 1 տոննայի համար գանձվող ակցիզային հարկի եւ ավելացված արժեքի հարկի հանրագումարը պետք է կազմի նվազագույնը 120 000 ՀՀ դրամ:
Հաշվի առնելով, որ ակցիզային հարկը եւ ավելացված արժեքի հարկը հանդիսանում են անուղղակի հարկատեսակներ, ուստի այդ հարկատեսակների դրույքաչափերի փոփոխությունները ուղղակիորեն անդրադառնում են ապրանքների վերջնական գների վրա»:
