Բելառուսի իրավապահ մարմինները ձերբակալել են միջազգային հանցավոր խմբի անդամներին, որոնք 3 մլն դոլար արժողությամբ ավելի քան 9 կգ մետադոն էին տեղափոխում: Այդ մասին հայտնել է Բելառուսի Ներքին գործերի նախարարությունը, հայտնում է ՏԱՍՍ-ը:
«Ձերբակալվածները միջազգային հանցավոր խմբի անդամներ էին, որը երկար ժամանակի ընթացքում զբաղվել է Միջին Ասիայից Եվրամիության երկրներ, Բելառուս եւ Ուկրաինա թմրանյութի, այդ թվում` հերոինի մատակարարմամբ», - նշել են ՆԳՆ-ից:
Այնտեղ տեղեկացրել են, որ Մոգիլեւյան շրջանում հատուկ գործողության ընթացքում ստուգման համար կանգնեցվել է «Ժիգուլի» ավտոմեքենա, որում գտնվել են Ուկրաինայի 38 տարեկան նախկինում դատված քաղաքացի եւ Մոգիլեւյան շրջանի 26 տարեկան չաշխատող բնակիչ: Տրանսպորտային միջոցի ստուգման ընթացքում հատուկ կառուցված թաքստոցներում օպերատիվ աշխատողները հայտնաբերել եւ առգրավել են «մետադոնի փաթեթ ընդհանուր ավելի քան 9 կգ քաշով, ինչը հավասար է թմրանյութի ավելի քան 200 հազար չափաբաժնի մոտ 3 մլն դոլար արժողությամբ», - ճշտել են ՆԳՆ-ից:
Բելառուսի ոստիկանության տվյալներով, այս խմբավորման այլ անդամներ արդեն հայտնվել էին օպերատիվ աշխատակիցների տեսադաշտում: Մասնավորապես, հիշեցրել են ՆԳՆ-ից, 2010-ին Ասիայից Եվրոպա թմրանյութի մատակարարման ուղու դադարեցման գործողության ընթացքում Բելառուսում ձերբակալվել էր տեղափոխողներից մեկը, որը 27 կգ հերոին էր տեղափոխում գլուխ սոխի անվան տակ: Հետագայում նա դատապարտվել է 14 տարվա ազատազրկման:
Ներկայումս օպերատիվ քննչական միջոցառումները, այդ թվում` տվյալ հանցավոր խմբի կազմակերպչի հետախուզման ուղղությամբ, շարունակվում են:
