Երեւանի Նուբարաշենում զինվորական կրակարանի մոտ գտնվող ջրամբարում  այսօր՝ հունիսի 29-ին,  ջրահեղձ եղած 20-ամյա Էդգարը երկու օր առաջ էր խոսել մայրիկի հետ եւ ասել՝ լավ է, թող պատրաստվեն, որ վաղը վերադառնալու է տուն: Այս մասին այսօր՝ հունիսի 29-ին, NEWS.am-ի հետ զրույցում ասաց Էդգարի հորաքույրը՝ Կատյա Չաղլյանը. «զանգել մորն ասել էր՝ «Լավ եմ, պատրաստվեք, վաղը գուքամ»»: Նա նշեց, որ Էդգարի մայրն ու հայրն իրենց միակ զավակի՝ բանակից վերադառնալու կապակցությամբ պատրաստություն տեսնելիս են եղել, երբ զանգել եւ հաղորդել են՝ Էդգարը մահացել է:

Կատյա Չաղլյանի խոսքով՝ Էդգարի ծնողներն արդեն մի քանի ժամ է փորձում են մանրամասներ ճշտել՝  ինչպես է պատահել դեպքը, ոնց է Էդգարը հայտնվել ջրամբարում եւ խեղդվել. «Զանգել են զինկոմիսարիատից, կանչել են՝ արեք ձեր երեխեն մեռել է, էնտեղից եկել է էս խեղճ մարդը ընկել է, ինֆարկտ կտանի: Ժամը 8-ին Երեւան էին կանչելու, որ  դիակը տեսնեն, հրաժարվան՝ վաղը արիք ըսին: Նստած տունը, ոչ մի բանից տեղյակ չենք»,-ասաց նա:

Կատյա Չաղլյանը նշեց, որ Էդգարը գոհ է եղել ծառայությունից եւ ոչ մեկից բողոք չի  ունեցել:

Ավելի վաղ NEWS.am-ը տեղեկացրել էր, որ Երեւանի Նուբարաշենում զինվորական կրակարանի մոտ գտնվող ջրամբարում  այսօր՝ հունիսի 29-ին,  ջրահեղձ եղած 20-ամյա երիտասարդը երկու տարվա զինծառայող էր, նա մի քանի օրից ծառայությունն ավարտելու էր:

Էդգար Չաղլյանը ընտանիքի միակ երեխան էր,  Շիրակի  մարզի Արթիկ քաղաքի բնակիչ:

Երիտասարդի խեղդվելու հանգամանքները ճշտվում են: