Աշխարհի լավագույն ֆուտբոլիստի «Ոսկե գնդակ» մրցանակի հավակնորդների եռյակը կազմել են Բարսելոնայի խաղացողներ Անդրես Ինյեստան, Չավին եւ Լիոնել Մեսին: Եռյակը հրապարկվել է այսօր, դեկտեմբերի 6-ին Փարիզում, հաղորդում է Եվրոսպորտը: Եռյակը ընտրվել է 23 հավակնորդներից:
Չավին ու Ինյեստան Իսպանիայի հավաքականի կազմում այս տարի հռչակվեցին աշխարհի չեմպիոն: Մեսին 2009/10-ին դարձավ Չեմպիոնների լիգայի լավագույն ռմբարկուն: Մեսին անցած մրցաշրջանի «Ոսկե գնդակի» տիրակալն է:
Լավագույն մարզչի հավակնորդների եռյակում են աշխարհի չեմպիոն Իսպանիայի հավաքականի գլխավոր մարզիչ Վիսենտե Դել Բոսկեն, Բարսելոնայի գլխավոր մարզիչ Պեպ Գվարդիոլան եւ Ինտերի հետ Չեմպիոնների լիգայում հաղթած, այժմ Ռեալի գլխավոր մարզիչ Ժոզե Մոուրինյոն:
ՖԻՖԱ-ն ու France Football պարբերականն առաջին անգամ աշխարհի լավագույն ֆուտբոլիստի միավորված մրցանակ են շնորհելու: Հանդիսավոր արարողությունը տեղի կունենա հունվարի 10-ին Ցյուրիխում: