Տեր Աբել քահանա Մանուկյանի եւ նրա կողմնակիցների մեկնաբանությունը, թե Շվեյցարահայ հայոց թեմի եւ Մայր Աթոռ Սուրբ Էջմիածնի կոնֆլիկտի պատճառն այն է, որ Մայր Աթոռը ցանկանում է համայնքի եւ ծխի գումարներին տիրանալ, Մայր Աթոռի դիվանապետ Տ. Արշակ եպիսկոպոս Խաչատրյանն անհեթեթություն է համարում: Այս մասին, այսօր` հունիսի 6-ին ասուլիսում հայտարարեց Տ. Արշակ եպիսկոպոս Խաչատրյանն ու հավելեց. «Թեմերը իրենք են տնօրինում իրենց նյութական միջոցները, անշարժ գույքը, իսկ լուծարման դեպքում միջոցները փոխանցվում են Մայր Աթոռ Սուրբ Էջմիածնին: Տեղի որոշ անձերի ակնկալություններն այն էր, որ այդ միջոցները փոխանցվեին ինչ-որ մզկիթի՞: Մայր Աթոռը որեւէ կերպ չի կարող միջամտել որեւէ թեմի նյութական միջոցներին: Թեմի համապատասխան կառույցներն իրենք են որոշում ինչ չափով, որքանով իրենց ներդրումը պետք է անել Էջմիածնի եւ առհասարակ ժողովրդի բարօրությանը, իսկ թեմից ստացված հասույթները Մայր Աթռոի 3 տոկոսն են կազմում»:
Ինչ վերաբերում է նրան, որ Տեր Աբել Մանուկյանին սատարում է շվեյցարահայ թեմը, նա նշեց, որ դա միայն իրենց կողմից է շրջանառության մեջ դրվել, իրենք իրենց իրավունք են վերապահել ժողովրդի անունից հանդես գալու:
Հիշեցնենք, որ Գարեգին Բ-ն հունիսի 1-ին կարգալույծ է հռչակել Տ. Աբել քահանա Մանուկյանին: Մայր Աթոռից հայտնել են, որ պատճառը քահանայի կողմից շարունակվող կարգազանց անուղղա ընթացքն է` «ի հետեւումն Աբել քահանայի կախակայման վերաբերյալ մայիս 5, 2011 թվակիր տնօրինության»: Կարգալույծ հռչակված հոգեւորականն այսուհետ կդասվի աշխարհականների շարքը եւ կկոչվի ավազանի անունով` Հրաչ Մանուկյան:
Շվեյցարիայի հայ համայնքի քահանա Տեր Աբել Մանուկյանը իրեն կարգալույծ հռչակելու կապակցությամբ հանդես է եկել Ամենայն հայոց կաթողիկոս Գարեգին Բ-ին ուղղված նամակով: «Ոչ ձեզնից կարգ ստանալն է պատիվ, եւ ոչ էլ կարգալույծ լինելը` անպատվություն: Դուք կկարծեք, թե կարգալույծ անելը Ձեր զորությունն է, մինչդեռ այն ձեր ամենամեծ տկարությունն է: Նկատի ունենալով, որ կարգալուծման սույն տնօրինումը եկեղեցական, վարդապետական, ծիսական, կանոնական, կարգապահական ոչ մի հիմք չունի եւ ընդհակառակը, արդյունք է ընդամենը կաթողիկոսի վստահված իշխանության չարաշահումի, այս որոշումը հայտարարում եմ անարդար, անընդունելի եւ ապօրեն»,- ասել է նա:
Ի դեպ, այս հայտատարության վերաբերյալ Տ. Արշակ եպիսկոպոս Խաչատրյանն ասաց. «Դա բացարձակ տգիտություն է: Եթե մինչեւ հիմա ինքը կաթողիկոսի կողմից կարգ ստանալը պատիվ չի համարել, ինչի համար է այդ պատիվները կրել թե եկեղեցականներից, թե ժողովրդից: Ես ուրիշ կերպ չեմ կարող գնահատել, եթե այդ հավատը գոյություն չունի եկեղեցականի մեջ, ապա անիմաստ է նրա մասին խոսել որպես անցյալ հոգեւորական»,- ասաց նա: