Փաստաբան Թամարա Յայլոյանը նորմալ է վերաբերում NEWS.am-ի հրապարակման հիման վրա իր դեմ կարգապահական վարույթ հարուցելուն: Այս մասին մեզ հետ զրույցում ասաց ինքը՝ փաստաբանը:
Թամարա Յայլոյանի դեմ վարույթ հարուցելու պատճառ էր հանդիսացել այն, որ նա մեզ հետ զրույցում նշել էր, որ Վալերի Պերմյակովին իրավական օգնություն է ցույց տվել Շիրակի մարզի քննչական վարչության պետի տեղակալի հրավերով. ինչպես նաեւ հայտնել, որ հրաժարվել է Վալերի Պերմյակովին իրավական օգնություն ցույց տալուց: «Նորմալ եմ վերաբերում վարույթին, եթե ես հրաժարվել եմ, պալատը այլընտրանք չի ունեցել եւ պետք է վարույթ հարուցեր»,-ասաց փաստաբանը՝ հավելելով, որ առայժմ բացատրություններ չի տվել վարույթը իրականացնողներին:
Ինչ վերաբերում է Շիրակի մարզային վարչության պետի տեղակալի հրավերով գործում ներգրավվելուն, Թամարա Յայլոյանն ասաց, որ փաստաբան ներգրավելու համար կարող են դիմել ազգականներ, բարեկամներ, մասնավոր անձինք, այս պարագայում նա ընկալել է, որ քանի որ քննությունն իրականացնում է ռուսական կողմը, ուստի Սահակ Մկրտչյանը իրեն դիմել է որպես մասնավոր անձ, այս հարցը, փաստաբանի փոխանցմամբ, պալատը դեռ կքննի:
«Եթե ինքը այդ գործի հետ առնչություն չունի, ինչ կապ ունի՝ ինչ պաշտոն է զբաղեցնում, այս պարագայում մասնավոր անձ է»,-ասաց Թամարա Յայլոյանը՝ վստահեցնելով, որ սա առաջին դեպքն է, երբ իրեն քննչական պետի տեղակալը դիմում է գործում ներգրավվելու համար: Թամարա Յայլոյանը չպատասխանեց այն հարցին, թե արդյոք իր հետ պայմանագիր կնքվել է, թե ոչ: Նա նշեց, որ այդ մասով ինքը մանրամասներ կներկայացնի Փաստաբանների պալատին:
Հարցին, թե ինչո՞ւ է հրաժարվել Պերմյակովի պաշտպանությունից, միթե գնալուց չէր իմացել, որ նա 6 մարդու սպանության մեջ է մեղադրվում, նա այսպես պատասխանեց. «Ես մտածում էի, թե կարող եմ, բայց հետո չկարողացա»: Փաստաբանը կարծում է, որ վարքականոնը խախտել է պաշտպանությունից հրաժարվելու մասով, իսկ գործում ներգրավելու մասով որեւէ խնդիր չի տեսնում: Իր պրոֆեսիոնալիզմը կասկածի տակ դնող անձանց էլ Թամարա Յայլոյանը հիշեցնում է, որ ինքը մի շարք ծանր հանցագործությունների աղմկահարույց գործերով պաշտպանություն է իրականացրել, այդ թվում՝ 1999թ ռուս զինվորական Դենիս Պոպովի գործով, պարզապես այն ժամանակ երեխա չկար սպանված: Փաստաբանը շեշտեց, որ որեւէ մեկը չի կարող 100 տոկոսով վստահ լինել իր հնարավորությունների մեջ: