Հայտնի է, որ Հայաստանում ապրանքների սպառման մակարդակը բավական ցածր է: Օրինակ՝ 2014 թվականին մանրածախ ապրանքաշրջանառության ծավալը չի հասել նույնիսկ ամսական 100 դոլարի՝ բնակչության մեկ շնչի հաշվարկով:
Մեր առեւտրում դեֆիցիտ չկա: Այնպես որ՝ ապրանքների սպառման մակարդակի բարձրացման համար մեկ պայման է անհրաժեշտ. բնակչության դրամական եկամուտների աճ: Մասնավորապես՝ մեր հասարակության ոչ հարուստ հատվածի: Ընթացիկ գներում մանրածախ ապրանքաշրջանառության կրճատումը վկայում է բնակչության ընթացիկ դրամական եկամուտների նվազման մասին:
Նախորդ տարի այսպիսի միտում է գրանցվել: Հունվար-նոյեմբերին հանրապետության մանրածախ ապրանքաշրջանառությունն ընթացիկ գներում տարեկան կտրվածքով նվազել է 5.8%-ով: Հիմնական պատճառը հայտնի է. ֆիզիկական անձանց դրամական փոխանցումների հոսքի անկում: ՀՀ Կենտրոնական բանկի կողմից վերջերս հրապարակված տեղեկատվության համաձայն, նոյեմբերին դրամական փոխանցումների գծով բացասական դինամիկան պահպանվել է:
Ռուսաստանում, այդ երկրի ՄԴԾ-ի՝ ընթացիկ տարվա հունվարի տվյալների համաձայն, Հայաստանի 467.5 հազար քաղաքացի կա: Ամենայն հավանականությամբ, նրանց գերակշռող մասն աշխատանքային միգրանտներ են: Չի բացառվում, որ նրանց աշխատավարձերը նվազել են, իսկ ոմանք էլ պարզապես աշխատանք չեն գտել:
Սակայն Ռուսաստանից դոլարով փոխանցված գումարը նվազել է նաեւ ռուսական ռուբլու փոխարժեքի հետեւանքով: Նույնիսկ ռուբլով փոխանցումների դեպքում, Հայաստանում դրամային համարժեքը նույնպես կրճատվել է:
Ներկայացվող գրաֆիկում ընթացիկ գներում հանրապետության մանրածախ առեւտրաշրջանառության, ինչպես նաեւ դրամական փոխանցումների ընդհանուր հոսքի դինամիկան է:
