Անցյալ տարվա դեկտեմբերը բացառություն չի կազմել մանրածախ ապրանքաշրջանառության հետեւողական կրճատման առումով: Նշենք, որ արդեն երկու տարի է, ինչ առեւտուրը, պատկերավոր ասած, տենդի մեջ է: Հետահայաց չափմամբ մի երկար ժամանակահատվածում առաջին անգամ մանրածախ ապրանքաշրջանառության ծավալը կրճատվում է ոչ միայն համադրելի գներով, այլեւ` ընթացիկ:
Այլ կերպ ասած, քաղաքացիները սկսել են ապրանք գնելու վրա ավելի քիչ գումար ծախսել , քան նախկինում: Պարզ է, որ համապատասխանաբար կրճատվել է առեւտրականների եկամուտը: Հատկապես կտրուկ անկում է նկատվել առեւտրական խոշոր կազմակերպությունների մոտ: Այդ բացասական երեւույթները հիմնականում կապված են արտաքին տրանսֆերտների հոսքի կրճատման հետ, որոնք շատ տնային տնտեսությունների բյուջեի եկամտի նշանակալի աղբյուրներից են:
Դեկտեմբերին Հայաստանում ընթացիկ գներով մանրածախ ապրանքաշրջանառությունը տարեկան կտրվածքով կրճատվել է 19,2 տոկոսով: Նշենք, որ ընդհանուր առմամբ, տարվա ընթացքում այդ անկումը կազմել է 7,8 տոկոս: Այստեղից հնարավոր է եզրակացնել, որ շատ ընտանիքներում եկամտի ճգնաժամը խորացել է:
Իրացման դանդաղումը հանգեցրել է մի շարք ապրանքների ապրանքային ռեսուրսների կրճատմանը: Այսպես, պատրաստի սննդամթերքի ներմուծման ծավալն անցյալ տարի կրճատվել է 12 տոկոսով, իսկ այդ նույն ապրանքների տեղական արտադրության ֆիզիկական ծավալը` 9 տոկոսով:
Այստեղ անկասկած իր դերն է խաղացել նաեւ բնակչության արտագաղթը, որն ակտիվացել է վերջին տարիներին: Բայց չափազանցություն կլիներ ամեն ինչ արտագաղթի վրա բարդելը: Ավելի շուտ վատացել է բնակչության մի մասի սննդակարգը, համեմատաբար թանկարժեք սննդամթերքից անցում է կատարվել դեպի ավելի էժան սննդամթերքը, եւ այլն: