Մայիսի 13-ին` ժամը 17:00-ից սկսած, ղարաբաղաադրբեջանական շփման գծի ողջ երկարությամբ հակառակորդը սկսել է արկակոծել ՊԲ մարտական հենակետերը, հատկապես ինտենսիվ՝ Մարտակերտի և Թալիշի ուղղություններով:
Ուրբաթ 13-ը սկսվեց ողբերգական երկու լուրով: Երկու հարձակում Երեւանում՝ երկուսն էլ մահվան ելքով:
Գիշերը ժամը 4-ին Շենգավիթ համայնքում երկու երիտասարդ լոգարանի պատուհանից ներխուժել են «Բրավո» տաքսի ծառայության տնօրենի տուն՝ թալանի նպատակով: Գողերը հույս ունեին, որ տանը միայն ամուսիններն են ու նրանց դպրոցական որդին: Մինչդեռ նրանց դիմադրություն էր ցույց տալու կնոջ հետ աներոջ տանը գիշերող փեսան, որը քիքբոքսինգի չեմպիոն է: Հրազենով ու դանակներով զինված կողոպտիչները հասցրել են մի քանի անգամ կրակել եւ դանակով վիրավորել տանտիրոջը, նրա որդուն եւ փեսային: Ընտանիքը սկսել է դիմադրել ձեռքի տակ ընկած իրերով: Ծեծկռտուքի հետեւանքով կողոպտիչներից մեկը՝ 29-ամյա Հրաչյա Ֆալանջյանը մահացել է: Ոստիկանությունը տեղեկացրել է, որ սպանվածը նախկին ոստիկան էր, երկու շաբաթ առաջ աշխատանքից հեռացվել էր կարգապահական խախտման համար: Մինչդեռ հարազատները պնդում են, որ Հրաչյան ոստիկանությունից չէր հեռացվել, ավելին՝ այդ գիշեր նա հերթապահության էր: Նրա հանցակիցը՝ Էդգար Մանուկյանը, հիվանդանոցում է: Հոսպիտալացվել են նաեւ տան երեք անդամները:
Դեպքից մի քանի ժամ անց Աջափնյակ թաղամասում երկու երիտասարդ է սպանվել՝ քույր ու եղբայր: Նախնական տվյալով՝ նրանց սպանել է աղջկա ընկերը: Շողիկ Արմենակյանի ընտանիքը դեմ էր Հայկի հետ նրա հարաբերություններին: Հայկը վերջերս էր դուրս եկել կալանավայրից: Առավոտյան ժամը 9-ին նա ներխուժել է Արմենակյանների տուն, խոհանոցի դանակով սպանել է 29-ամյա Շողիկին ու եղբորը՝ 25-ամյա Շավարշին, վնասել նրանց հորը: Մայրն այդ պահին աշխատանքի է եղել: Հայրը վազել է Հայկի հետեւից, բայց չի հասել: Հայկը դեպքի վայրից փախուստի է դիմել: Նրան այժմ որոնում են:
Երեւանում մայիսի 12-ին նորածին է մահացել: 7 օրական տղան ծնվել էր առանց ձախ երիկամի, սրտի արատով եւ գլխավոր աորտայի թերզարգացմամբ: Նա 38-ամյա Սեդա Ամոյանի առաջնեկն էր: Հարազատները պնդում են, որ հղիության ընթացքում բոլոր անհրաժեշտ հետազոտություններն անցել են 4-րդ պոլիկլինիկայում, եւ բժիշկները երեխայի մոտ որեւէ շեղում չեն նկատել: Ծնվելուց հետո պարզվել է՝ երեխան լուրջ առողջական խնդիրներ ունի: Ծնվելուց յոթ օր անց նրան սրտի վիրահատության են ենթարկել, ինչի ժամանակ էլ մահացել է:
Պաշտոնյաների եւ քաղաքական գործիչների այսօրվա քննարկումների հիմնական թեման վարչապետի երեկվա հայտարարությունն էր՝ տնտեսական լուրջ փոխություններ սկսելու մասին: Արդարադատության նախարարը կրկնել է վարչապետի ձեւակերպումը՝ կոռուպցիայի դեմ պայքարում են, որոշ արդյունքներ ունեն, բայց դրանք բավարար չեն: Նախարարությունը մշակել եւ կառավարությանն է ներկայացրել բարձրաստիճան պաշտոնյաների համար քրեական ու վարչական պատասխանատվություն նախատեսող օրինագիծ:
Կառավարության նպատակը ոչ թե հարուստների դեմ պայքարելն է, այլ որ այդ միլիոնները ձեռք չբերվեն ապօրինի ճանապարհով՝ վարչապետի ելույթին անդրադառնալով ասել է Դավիթ Հարությունյանը: Լրագրողների հարցին՝ միթե մոնոպոլիստների անունները իշխանություններին հայտնի չեն, եւ նրանց դեռ նոր պիտի հայտնաբերեն, աշխատակազմի ղեկավարն ասել է՝ դա տնտեսական ուսումնասիրության խնդիր է, պետք է հասկանալ, թե որ դեպքում է մենաշնորհը վնասում տնտեսությանը:
Կաշառակերության դեմ պայքարի վերաբերյալ Հովիկ Աբրահամյանի ամբողջ ելույթը քրեական խոստովանական ցուցմունք է՝ կարծիք է հայտնել «Ժառանգության» փոխնախագահ Արմեն Մարտիրոսյանը: Վարչապետի ելույթի միակ ճիշտ բանը «հարգելի գործընկերներ» արտահայտությունն էր՝ ասել է Արմեն Մարտիրոսյանը. ելույթի տրամաբանական ավարտը պետք է լիներ նրա հրաժարականը:
Վարդան Այվազյանը համաձայն չէ նրանց հետ, ովքեր չեն հավատում, որ վարչապետը իրական պայքար է սկսել մենաշնորհների դեմ: Նա այսօր առաջարկել է սպասել կոնկերտ քայլերի եւ արդյունքների, եւ միայն դրանից հետո գնահատական տալ: Ինչ վերաբերում է ժողովրդի հաշվին հարստացած պաշտոնյաներին, Վարդան Այվազյանն ասել է՝ ինքը, ի տարբերության ուրիշների, հարստացել է դրսում վաստակած փողերով:
Մայիսի 13-ին, ժամը 14։00 ի սահմանում Հայաստանի տարածքում հայկական զինված ուժերը հետախուզական անօդաչու թռչող սարք են չեզոքացրել: Դեպքը տեղի է ունեցել Վայոց ձորում: Այլ մանրամասներ դեռ չեն հրապարակվում:
Սկսվել է 2016-ի ամառային զորակոչը: Սերժ Սարգսյանն արդեն հրամանագիրը ստորագրել է: Մայիս-հուլիս ամիսներին պարտադիր ծառայության կմեկնեն զորակոչի ենթակա բոլոր տղաները: Նույն ժամանակահատվածում կիրականացվի նաեւ զորացրումը:
Հրապարակվել է Հռոմի Ֆրանցիսկոս Պապի հայաստանյան այցի օրակարգը: Քահանայապետը Երեւան կժամանի հունիսի 24-ին: Նույն օրը երեկոյան կհանդիպի Սերժ Սարգսյանի, ապա՝ իշխանությունների, հասարակության եւ դիվանագիտական կորպուսի ներկայացուցիչների, ապա՝ Գարեգին Բ Ամենայն Հայոց Կաթողիկոսի հետ: Հունիսի 25-ին Հռոմի պապը կայցելի Ծիծեռնակաբերդ, այնուհետեւ Կաթողիկոսի հետ կմեկնի Գյումրի, որտեղ Պատարագ կմատուցվի Վարդանանց հրապարակում: Նույն օրը երեկոյան Երեւանում՝ Հանրապետության հրապարակում, տեղի կունենա Խաղաղության Աղոթք: Հովվապետերը նաեւ աղոթք կմատուցեն Խոր Վիրապի վանքում:
Իվետա Մուկուչյանը ճանաչվել է «Եվրատեսիլի» հաջորդ թոփ մոդելի մրցույթի հաղթող: Ապրիլից սկսված քվեարկոթւյան արդյունքներով մեր պատվիրակը այս տարվա մասնակիցներից ամենագեղեցիկ աղջիկն է: Նա մոտ տասը տոկոսով առաջ է անցել երկրորդ տեղը զբաղեցրած՝ Ադրբեջանի մասնակցից: Մայիսի 14–ին կայանալիք եզրափակիչ փուլում Իվետան ելույթ կունենա վերջին համարի ներքո:
Այսօր բոլոր հիմնական արտարժույթները էժանացել են: Դոլարի փոխարժեքը կազմել է 479, եվրոյինը՝ 543, ֆունտինը՝ 690, իսկ ռուբլունը՝ 7.35 դրամ:
Երեւանում մայիսի 14-ին հնարավոր է կարճատեւ անձրեւ եւ ամպրոպ: Առաջիկա գիշերը մայրաքաղաքում օդի ջերմաստիճանը կհասնի +16, իսկ վաղը ցերեկը՝ +29-ի: