ԱՄՆ Մասաչուսեթսի նահանգի Հավերհիլ քաղաքի հայկական եկեղեցու տեղում ուզում են առեւտրի կենտրոն կառուցել: Այս մասին հայտնում է EagleTribune-ը: Վեց տարի առաջ քաղաքը մերժել էր պատմական եկեղեցու տեղում՝ Մայնի եւ Վինթերի փողոցների անկյունում՝ քաղաքապետարանի դիմաց, Burger King կառուցելու առաջարկը: Հիմա առաջարկում են եկեղեցու տեղում առեւտրի կենտրոն կառուցել, որտեղ կլինի նաեւ Domino's Pizza պիցցայանոց, գրում է թերթը:
Քաղաքապետարանից հայտնել են, որ այս պահին ոչ մի որոշակի բան չկա, քանի որ առաջարկը դեռ նախնական փուլում է: Քաղաքի տնտեսական զարգացման տնօրեն Ուիլյամ Փիլսբուրին թերթի հետ զրույցում նշել է, որ Domino's Pizza-ի սեփականատերը գծագրեր է ներկայացրել փոքր առեւտրի կենտրոնում իր շինությունն ունենալու համար:
Սակայն, Փիլսբուրիի խոսքով, ամբողջական դիմում դեռ քաղաքապետարանին չի ներկայացվել: Նա նաեւ հավելել է, որ գործընթացի շրջանակներում քաղաքի Պատմության հանձնաժողովը կուսումնասիրի նախագիծը՝ պարզելու համար, թե որքանով է այն օրինական, քանի որ եկեղեցին հաշվառված է Ազգային ռեգիստրում որպես պատմական վայր եւ գտնվում է Main Street-ի պատմական թաղամասում:
«Միայն դրանից հետո հանրային լսումներ կկայանան»,- ասել է Փիլսբուրին: Հայ առաքելական եկեղեցու առաջնորդներն ասել են, որ ուզում են վաճառել շենքը նոր եկեղեցու շինարարությունը ֆինանսավորելու համար, որը կլինի Բրեդֆորդի Բոսթոն Ռոդ 1280 հասցեում:
Հայ առաքելական եկեղեցու համայնքային խորհուրդը պլանավորում է նիստ հրավիրել հին եկեղեցու վաճառքը քննարկելու համար: Նշենք, որ Hye Pointe եկեղեցին հիմնվել էր 2002-ին: