Ողբերգական պատահար Հյուսիսային Օսիայում: Առավոտյան ժամը 04:30-ի սահմաններում Վլադիկավկազ-Բեսլան շրջանցիկ ճանապարհին Մոսկվա-Երեւան երթուղու ավտոբուսը բախվել է «Սկանիա» բեռնատարին: Պատահարի հետեւանքով 5 մարդ է զոհվել, 27 վիրավոր կա: Տուժածներից 4-ը երեխաներ են: Ներկայում տարբեր հիվանդանոցներում 9 տուժած կա, այդ թվում՝ 4 երեխաները: Նրանցից երկուսը վերակենդանացման բաժանմունքում են, մեկի վիճակը բժիշկները ծանր են գնահատում: Տուժածների խոսքով՝ վթարի պահին ուղեւորների մեծ մասը քնած է եղել: Մինչ փրկարարների ժամանումը տուժածներին առաջին օգնություն են ցուցաբերել եւ ավտոբուսից դուրս բերել հենց ուղեւորները:
Ռուսաստանում Հայաստանի դեսպանության տվյալներով՝ զոհերից երկուսը Հայաստանի, երեքը՝ Ռուսաստանի քաղաքացիներ են: Զոհված ռուսաստանցիների թվում են երիտասարդ մարզիկ ու նրա մարզիչը, որոնք Հայաստան էին գալիս՝ կարատեի մրցումների մասնակցելու:
Ռուսաստանի նախագահը հանձնարարել է տեղափոխության ենթակա ուղեւորներին Երեւան հասցնել Ռուսաստանի ԱԻ նախարարության օդանավով: Երեւանում գտնվող Ռուսաստանի տրանսպորտի նախարարն այսօր Սերժ Սարգսյանի հետ հանդիպմանը տեղեկացրել է իրականացվող աշխատանքների մասին:
Երեկոյան «Զվարթնոց» օդանավակայանում վայրէջք է կատարել ռուսական օդանավը: Նույն ինքնաթիռով Հայաստան է տեղափոխել նաեւ պատահարի հետեւանքով զոհված ավտոբուսի վարորդ Յուրա Պողոսյանի դին:
Հյուսիսային Օսիայի ներքին գործերի նախարարության նախնական տվյալներով՝ ուղեւորատար ավտոբուսի վարորդը կորցրել է կառավարումը, ինչի հետեւանքով էլ բախվել է մայթեզրին կանգնած բեռնատարին: Այլ աղբյուրի համաձայն՝ վարորդը քնել է ղեկին: Հարուցվել է քրեական գործ՝ ճանապարհային երթեւության կանոնները խախտելու փաստով: Քննչական խումբ է ստեղծվել:
Ռուսական աղբյուրների հաղորդմամբ՝ վթարի ենթարկված փոխադրամիջոցն առանց Ռուսաստանի տրանսպորտի նախարարության թույլտվության է աշխատել: Բացի այդ, վարորդները տարբեր ժամանակներում վարչական պատասխանատվության են ենթարկվել՝ ամրագոտի չկապելու եւ արագությունը գերազանցելու համար: Ավտոբուսը մեծ արագությամբ բախվել է բեռնատարին: Բախումն այնքան ուժեղ է եղել, որ դրա կցորդում եղած թեթեւ մարդատար ավտոմեքենաները դուրս են թռել:
ՀԱՊԿ կանոնադրական մարմիններում նախագահությունն այսօր Հայաստանից փոխանցվել է Բելառուսին: Հանդիսավոր արարողությունը կայացել է Երեւանում՝ ՀԱՊԿ անդամ պետությունների արտաքին գործերի, պաշտպանության նախարարների եւ ազգային անվտանգության խորհուրդների քարտուղարների համատեղ նիստում:
Երեւանում կայացել է ՀԱՊԿ Հավաքական անվտանգության խորհրդի նիստը, որին մասնակցելու նպատակով այսօր Հայաստան են ժամանել նաեւ Ռուսաստանի եւ Բելառուսի նախագահները: Օդանավակայանում Վլադիմիր Պուտինին դիմավորել է Սերժ Սարգսյանը, իսկ Ալեքսանդր Լուկաշենկոյին՝ Գագիկ Ծառուկյանն ու Սուրեն Կարայանը:
Ավելի ուշ արդեն պետությունների ղեկավարները նախագահականում էին: Սերժ Սարգսյանը դիմավորել է գործընկերներին, իսկ հետո միասին լուսանկարվել են:
ՀԱՊԿ Հավաքական անվտանգության խորհրդի նիստի մեկնարկին Սերժ Սարգսյանը բոլորի անունից առողջություն է մաղթել Նուրսուլթան Նազարբաեւին: Նիստում Ղազախստանը ներկայացրել է վարչապետը:
Նստաշրջանի օրակարգի առանցքում են եղել ՀԱՊԿ անցյալ տարվա գագաթաժողովների որոշումների իրականացման ընթացքը, ինչպես նաեւ Կազմակերպությունում նախագահության ընթացքում Հայաստանի կողմից առաջադրված առաջնահերթությունները:
Ակնկալվում էր, որ նիստում կազմակերպության նոր գլխավոր քարտուղար է ընտրվելու: Սակայն հարցը հանվել է օրակարգից եւ կքննարկվի տարեվերջին, Սանկտ Պետերբուրգում։
Ֆրանսիայի Սենատն ընդունեց Հայոց ցեղասպանության ժխտումը քրեականացնող օրինագիծը: «Հավասարություն եւ քաղաքացիություն» կոչվող օրինագծի փոփոխություններին կողմ է արտահայտվել 156 պատգամավոր, դեմ՝ 146-ը:
Այսպիսով, Ֆրանսիայում պատիժ է սահմանվում մարդկության դեմ գործած բոլոր հանցագործությունները, այդ թվում` Հայոց ցեղասպանությունը ժխտելու եւ հերքելու համար: Ֆրանսիական խորհրդարանի ստորին պալատը՝ Ազգային ժողովը, այս օրինագիծն ընդունել էր ամռանը:
Ճանապարհային պատահար, այնուհետեւ վիճաբանություն Գյումրիում, որն ավարտվել է փոխհրաձգությամբ: Իրար բախված «ԲՄՎ» եւ «Մերսեդես» մակնիշի ավտոմեքենաների վարորդները սկսել են վիճել, որը խմբակային խուլիգանության է վերածվել: Որոշ մասնակիցների մոտ զենք է եղել: Չնայած ականատեսները մեր թղթակցին պատմել են, որ կրակոցի ձայներ են լսել, սակայն քննչական կոմիտեն դեռեւս չի հաստատում այս փաստը:
Միջադեպի մասնակիցներից մեկը փախուստի դիմելիս հարեւանությամբ գտնվող մանկապարտեզի բակ է նետել ՏՏ տեսակի ատրճանակը: Դեպքի վայրում նաեւ արյան հետքեր են հայտնաբերվել, սակայն ոչ ոք հիվանդանոց չի դիմել: Քրեական գործ է հարուցվել:
Վարուժան Սուքիասյանն այլեւս Ֆուտբոլի Հայաստանի ազգային հավաքականի գլխավոր մարզիչը չէ: 2018 թվականի Աշխարհի առաջնության ընտրական փուլի երկրորդ տուրում ռումինացիներից կրած 0:5 հաշվով տնային պարտությունից հետո Սուքիասյանը հայտարարել էր, որ Ֆեդերացիայի պահանջի դեպքում հրաժարական կտա: Այդ խաղից 3 օր անց էլ Հայաստանի հավաքականը Վարշավայում 1:2 հաշվով պարտվեց Լեհաստանին թիմին: Սուքիասյանը Հայաստանի հավաքականը գլխավորում էր 2015 թվականի դեկտեմբերի 10-ից: Նրա գլխավորությամբ Հայաստանի հավաքականը 7 հանդիպում է անցկացրել՝ կրելով 4 պարտություն, տանելով 2 հաղթանակ եւ մեկ հանդիպում ավարտելով ոչ ոքի: Աշխարհի առաջնության ընտրական փուլում մեր հավաքականը պարտվել է բոլոր երեք խաղերում:
Հոկտեմբերի 14-ին դոլարի վերելքը կանգ է առել, այն նույնիսկ փոքր-ինչ էժանացել է: Արդյունքում դոլարի փոխարժեքը կազմել է 476 դրամ, եվրոյինը՝ 525, ռուբլունը՝ 7 դրամ 57 լումա, ֆունտինը՝ 581 դրամ։
Հոկտեմբերի 15-ի գիշերը շրջանների զգալի մասում, ցերեկը՝ Վայոց ձորում, Սյունիքում եւ Արցախում, սպասվում է անձրեւ: Օդի ջերմաստիճանն աստիճանաբար կնվազի 7-9 աստիճանով: Երեւանում հոկտեմբերի 15-ին սպասվում է կարճատեւ անձրեւ, հնարավոր է ամպրոպ: