Նախօրեին ձերբակալված Սամվել Բաբայանն այսօր ցուցմունք է տվել: Նրա շահերի պաշտպան Ավետիս Քալաշյանը տեղեկացրել է, որ Բաբայանն իր նկատմամբ կասկածներն անհիմն է համարում, չի ընդունում եւ չի ճանաչում նույն գործի շրջանակում մյուս ձերբակալվածներին: Փաստաբանը նշել է նաեւ, որ Սամվել Բաբայանին դեռեւս մեղադրանք չի առաջադրվել: Նա նաեւ չգիտի, թե ինչ հիմքով են ձերբակալել իր պաշտպանյալին:
Նշենք, որ Սամվել Բաբայանը ձերբակալվել է մաքսանենգ եղանակով Վրաստանից Հայաստան «ԻԳԼԱ» տեսակի զենիթա-հրթիռային համալիրի տեղափոխման գործով: Քրեական գործի շրջանակում, Բաբայանից բացի, եւս 2 անձ է ձերբակալվել: Ազգային անվտանգության ծառայության տեղեկացմամբ՝ հայտնաբերվել ու առգրավվել է «ԻԳԼԱ»-ի արձակման խողովակ՝ «9M39» հրթիռով: ԱԱԾ-ն արդեն աշխատում է Վրաստանի գործընկերների հետ՝ փորձելով ստուգել հայտնաբերված ռազմամթերքը հայ-վրացական պետական սահմանով ենթադրաբար անցկացնելու վերաբերյալ ձեռք բերված նախնական տվյալների հավաստիությունը:
Մինչ այդ՝ Վրաստանի պաշտպանության նախարարությունը հայտարարել է, որ Վրաստանի տարածքով Ռուսաստանից Հայաստան ռազմական տեխնիկայի տարանցման թույլտվություն իրենք չեն տվել: Բոլնիսի շրջանում ռուսական պետհամարանիշերով մի քանի բեռնատար մեքենաներ նկատել են, որոնցում, ըստ վրացական կողմից, ամենայն հավանականությամբ, ԲՈՒԿ ինքնագնաց զենիթա-հրթիռային համալիր է եղել: Բայց դա ոչ թե ռազմական, այլ քաղաքացիական նշանակության տեխնիկա է: Հավելենք նաեւ, որ Սամվել Բաբայանի ձերբակալությունը «Օհանյան-Րաֆֆի-Օսկանյան» դաշինքը որակում է որպես քաղաքական հետապնդում: Բաբայանը երբեք չի հերքել իր կապն այս դաշինքի հետ:
Կենտրոնական ընտրական հանձնաժողովն այսօր սահմանել է ապրիլի 2-ի խորհրդարանական ընտրությունների ընտրական քվեաթերթիկի նմուշը: Դրանք նախապես ներկայացվել են ընտրություններին մասնակցող կուսակցությունների ու դաշինքների ներկայացուցիչներին: Հրատարակչատանը քվեաթերթիկների տպագրությունը բաց է եղել. գործընթացին հետեւելու հնարավորություն են ունեցել բոլոր ցանկացողները:
Իսկ քաղաքական ուժերը շարունակում են նախընտրական քարոզչությունը: Շենգավիթում հանդիպման ժամանակ ընտրողներից մեկը Կարեն Կարապետյանին հարցրել է «Նաիրիտ»-ի ճակատագրի մասին: Վարչապետը հստակ հայտարարել է. պետությունը չի վերականգնելու գործարանը, բայց խելամիտ ներդրողին հնարավորությունների չափով կաջակցի։ Պարզապես ուշադիր կլինեն ներդրողի ընտրության հարցում:
«Ծառուկյան» դաշինքի ղեկավարն էլ այսօր կրկին մարզերում էր: Դիլիջանում ելույթից հետո նա սկսել է հավաքել իրեն հասցեգրված նամակները, իսկ մի տատիկ նամակի փոխարեն ուտելիքով լի տոպրակ է տվել, թե՝ «Կսնվես, բալա ջան, ճամփա ես գնում»:
Իսկ Սեւանում հանդիպման ժամանակ խոստովանել է. չնայած Տիգրան Մուկուչյանից նկատողություն է ստացել, բայց երեկ Եղեգնաձորից մի տարեց կնոջ է օգնել: Կինն ասել է, որ կոտրել է ոտքը, բայց քանի որ փող չունի, հիվանդանոցում հրաժարվել են իրեն բուժօգնություն ցուցաբերել: Չի դիմացել, օգնել է, բայց ոչ թե տեղում եւ անձամբ, այլ ժամեր անց՝ «ընկերների միջոցով»:
Ի դեպ՝ նախընտրական շրջանում օգնության մասին: Դեռեւս նկատողություն չի ստացել, բայց խոստումներ է տալիս պատգամավորության թեկնածու Սամվել Ալեքսանյանը: Շենգավիթում հանդիպման ժամանակ բժիշկ Սերգեյ Կիրակոսյանը խնդրել է Երեւանում աշխատանքի տեղավորել: Խոստացել է օգնել:
Վարդենիսում էլ «Ելք» դաշինքի ներկայացուցիչները վթարի են ենթարկվել: Նիկոլ Փաշինյանն իր մեքենայով բախվել է մեկ այլ մեքենայի: Facebook-ում գրել է, որ մեքենայի ղեկին ինքն է եղել, «արգելակները չեն պահել ու բախվել են դիմացի մեքենային»: Վիրավորներ չկան, իսկ մեքենայում Փաշինյանի հետ են եղել նաեւ Էդմոն Մարուքյանն ու Արամ Սարգսյանը:
Կառավարության այսօրվա նիստի օրակարգը հագեցած է եղել, վարչապետի հանձնարարականները՝ շատ: Կարեն Կարապետյանը նաեւ բազմաթիվ դժգոհություններ է ունեցել: Նախ՝ Սեւանա լճի եւ հարակից տարածքների խնդիրների մասին. այստեղ հատուկ հարկային գոտի են ստեղծելու, պրոգրեսիվ հարկերով ակտիվ ունեցող մարդկանց դրդելու են գործ անել: Վարչապետը խնդիր է տեսնում նաեւ «Սեւան» ազգային պարկի տնօրենի աշխատանքում: Այդ հարցով հանձնարարականը բնապահպանության նախարարին էր ուղղված:
Բիզնեսով արդեն զբաղվողներն էլ պետք է իմանան. անբարեխիղճ աշխատողները հարկայինի թիրախում են: Վարչապետը հանձնարարել է քարոզել հարկային ու մաքսային ծառայության՝ վերջերս բացված մոնիթորինգի կենտրոնի աշխատանքը:
Կարեն Կարապետյանը վերջերս ավելի հաճախ է մարզեր այցելում եւ Լոռիում հնարավոր ներդրողների հետ հանդիպման ժամանակ նոր աշխատատեղերի ստեղծման հնարավորություն է արձանագրել: Սուրեն Կարայանին հանձնարարել է ֆինանսավորել խոշոր գործատուների վարկերի տոկոսների մի մասը:
Եվս մեկ հանձնարարական էլ ոստիկանապետի համար էր. դժգոհություններ են ստանում: Ինքը՝ վարչապետն էլ դժգոհ է համայնքային ու մարզային նշանակության ճանապարհների ու կամուրջների կառուցման տեմպերից. արագացնել է պետք, իսկ պատասխանատուների հետ՝ կոշտ խոսել:
Իսկ մարզպետերն ու համայնքապետերը նորից ուսանողական նստարանին կհայտնվեն. աշխարհն այսօր արագ է փոխվում եւ հարկավոր է մրցունակ լինել: Վարչապետը նրանց աշխատանքի արդյունավետությունը բարձրացնելու միջոց է գտել:
Հնարավոր է՝ շուտով հոլիվուդյան ֆիլմերին համարժեք կինոարտադրություն ունենանք: Կառավարությունը հետաքրքիր առաջարկ է ստացել բրիտանացի ռեժիսոր Դեյվիդ ՄաքՔենզիից: Նա ուզում է Հայաստանում Կինոյի և հեռուստատեսության դպրոց հիմնել, որը Լոս Անջելեսի Կինոյի դպրոցի գործընկերը կդառնա: Երեք տարվա ընթացքում այն կինոարտադրության համար անհրաժեշտ գույք եւ սարքավորումներ կբերի Հայաստան:
Այսօր նույնպես Ազգային ժողովում քվորում չի ապահովվել: Խորհրդարանում նորից 13 պատգամավոր է եղել՝ քվորում ապահովելու համար անհրաժեշտ 66-ի փոխարեն: Նշենք, որ սա հինգերորդ գումարման խորհրդարանի վերջին քառօրյան էր:
Պոլսո հայոց պատրիարքարանում կրքերը դեռ թեժ են: Տեղապահի ընտրությունում պարտված Արամ արքեպիսկոպոս Աթեշյանը մտադիր չէ հրաժարական տալ: Նամակով նրան է դիմել ընտրված տեղապահ Գարեգին արքեպիսկոպոս Բեքչյանը՝ կոչ անելով հավատարիմ մնալ Էջմիածնում Ամենայն Հայոց Կաթողիկոսի մոտ տված խոստմանն ու հրաժարական տալ եկեղեցական կարգում գոյություն չունեցող պաշտոնից: Աթեշյանը ոչ միայն հրաժարական չի տվել, այլ պատասխանել է նամակին՝ պնդելով, թե դեռ այդ պահը չի հասունացել: Այս թեժ երկխոսությանը միացել է Պոլսո պատրիարքարանի կրոնական ժողովի ատենապետ, Սահակ եպիսկոպոս Մաշալյանը՝ Աթեշյանին կոչ անելով ընտրություն կատարել՝ լինել թուրքական պետությա՞ն, թե՞ հայկական եկեղեցու հետ։
Լոռիում արտակարգ դեպք է տեղի ունեցել: Ալավերդիում մի տղամարդ կամրջից Դեբետ գետն է նետվել: Փրկարարները կամրջից մի քանի կիլոմետր հեռու գետում Ալավերդիի 50-ամյա բնակչի դին են հայտնաբերել: Նախնական տեղեկություններով՝ տղամարդն ինքնասպան է եղել: Լուրեր են պտտվում, որ նա հոգեկան խնդիրներ է ունեցել:
Մարտի 23-ին դոլարը շարունակել է թանկանալ, նրան է միացել նաեւ ռուբլին: Արդյունքում դոլարի փոխարժեքն այսօր կազմել է 484 դրամ, եվրոյինը՝ 521, ռուբլունը՝ 8 դրամ 41 լումա, ֆունտինը՝ 604 դրամ:
Մարտի 24-ի հանրապետությունում սպասվում է առանց տեղումների եղանակ: Օդի ջերմաստիճանն աստիճանաբար 5-6 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի -1+1, ցերեկը՝ +12+14 աստիճան տաքություն: