Հրազդանում տեղի է ունեցել նախօրեին Արցախում զոհված զինծառայող Արտակ Ռաֆայելյանի հոգեհանգիստը: Արարողությանը ներկա է եղել պաշտպանության նախարար Վիգեն Սարգսյանը:

Արտակ Ռաֆայելյանը հետմահու պարգեւատրվել է «Մարտական ծառայություն» մեդալով: Ապրիլի 13-ին Արտակը 20 տարեկան կդառնար, զորացրվելու էր հուլիսին: Ռաֆայելյանն ընտանիքի ավագ որդին էր, կրտսեր եղբայրն այս տարի է զորակոչվել բանակ: Նա «Գինեսի» գրքի ռեկորդակիր էր. 7 ժամ անընդմեջ 11011 անգամ հենում-ծալում վարժություն է կատարել եւ գրանցվել «Հայկական դյուցազնագրքում» եւ «Գինեսի» գրքի ռեկորդակիր դարձել:

Այսօր նախընտրական քարոզչության ամփոփիչ հավաքն էր կազմակերպել «Կոնգրես-ՀԺԿ» դաշինքը: Լեւոն Տեր-Պետրոսյանը, ի դեպ, հավաքին, ինչպես նաեւ դրան հաջորդած «Խաղաղության երթին» չի մասնակցել: Ամբողջ քարոզարշավի ընթացքում նա միայն երկու անգամ հեռուստատեսությամբ հարցազրույց է տվել, իսկ քարոզչական հանդիպումներից ոչ մեկին չի մասնակցել, թեեւ գլխավորում է դաշինքի ընտրական ցուցակը: Իսկ դաշինքի ներկայացուցիչների ելույթներն այսօր կարճ էին: Արամ Մանուկյանը բացատրել, թե ինչու:

Լեւոն Զուրաբյանն էլ խոսել է արդար ընտրության ակնկալիքների մասին: Ասել է, որ իրենց հաջողվել է հեղափոխություն անել. երկարատեւ քննարկումների արդյունքում, իր խոսքով, իշխանություններին կարողացան պարտադրել ընտրատեղամասերում տեսախցիկներ տեղադրել, քվեարկությունից հետո էլ հրապարակել ընտրական ցուցակները:

Նախընտրական քարոզչության շրջանակում Կարեն Կարապետյանը պետք է հանդիպեր Հրազդանի ընտրողների հետ: Սակայն հանդիպումն ու նախանշված համերգն այստեղ չեղարկվել են. Հրազդանում տեղի ունեցավ Արցախում զոհված զինծառայողի հոգեհանգիստը:

Սակայն Կարապետյանը հանդիպումներ է ունեցել Կոտայքի այլ բնակավայրերում: Գառնիում վարչապետից երկաթգիծ են պահանջել. ճանապարհ չունեն, բնակավայրն անկլավի է վերածվել: Կարեն Կարապետյանը պահանջն անիրագործելի է համարում: Աբովյանում էլ վարչապետն անհնար է համարել «Սիրիուս» գործարանի վերագործարկումը: Մանրամասն բացատրել է, թե ինչու եւ հավելել, որ այդտեղ նոր աշխատատեղեր կարող են բացվել:

Երեկ Գագիկ Ծառուկյանը հայտարարել էր 15 մլրդ դոլարի օտարերկրյա ներդրման հնարավորության մասին՝ ընտրություններում իր գլխավորած դաշինքի հաղթանակի դեպքում: Այսօր այդ մասին հարցին ի պատասխան՝ Էդուարդ Շարմազանովը Ջիվանուն է հիշել: Շարմազանովը վստահում է ընտրությունների նախաշեմին հրապարակվող սոցհարցումների արդյունքներին: Ինքն էլ կանխատեսում է, որ ապրիլի 2-ից հետո կկարողանան կառավարություն ձեւավորել:

Նիկոլ Փաշինյանը կասկածում է, որ Հանրապետականի ներկա եւ նախկին կոալիցիոն գործընկերներ ՀՅԴ-ն եւ «Հայկական վերածնունդը»՝ նախկին ՕԵԿ-ը, խորհրդարան կանցնեն: Դաշնակցությունից Աղվան Վարդանյանը զարմացած է: Ֆեյսբուքյան գրառմամբ Վարդանյանը նշել է, որ թվում էր՝ Փաշինյանը «կամաց-կամաց հասուն, հավասարակշիռ, շրջահայաց քաղաքական գործչի որակներ է ձեռք բերում», բայց սխալվել է: «Չգիտեմ՝ իջեւանցի իր նախնիները կոմունի՞ստ, թե՞ դաշնակցական են եղել: Բայց գիտեմ` ելք կա: Ու ելքը Դաշնակցությունն է»,- գրել է Աղվան Վարդանյանը:

ԵԱՀԿ Մինսկի խմբի համանախագահներն ավարտել են տարածաշրջանային այցերն ու հանդես եկել ամփոփիչ հայտարարությամբ: Դրանում նշվում է, որ Հայաստանի եւ Ադրբեջանի նախագահները պատրաստակամություն են հայտնել շարունակել բանակցային գործընթացը՝ խնդրի քաղաքական լուծման ուղղությամբ: Եռանախագահները ԵԱՀԿ գործող նախագահի անձնական ներկայացուցչի հետ նախ եղել են Բաքվում, հետո՝ Երեւանում եւ Ստեփանակերտում:

Արցախում Մինսկի խմբի անդամները քննարկել են Կասպրշիկի խմբի ընդլայնման հարցը. այն յոթ մարդով ավելացնելու մասին նախնական համաձայնություն կա։ Սակայն բանակցային գործընթացին Ստեփանակերտի միանալու հարց այս անգամ չի քննարկվել:

Ռուսաստանաբնակ հայ գործարար Սամվել Կարապետյանը գնել է «Հրազդան ՋԷԿ»-ը: Հանրային ծառայություները կարգավորող հանձնաժողովն այսօրվա նիստում «Հրազդանի էներգետիկ կազմակերպություն» ընկերության 100 տոկոս բաժնետոմսերը վաճառելու թույլտվություն է տվել: Հիշեցնենք, որ 2015 թվականի հոկտեմբերին ռուսական «Ինտեր ՌԱՕ» հոլդինգը «ՀրազՋԷԿ»-ի 100% բաժնետոմսերը վաճառել է «Տաշիր» հոլդինգի «Լիորմանդ Հոլդինգզ Լիմիթեդ» կազմակերպությանը: Այսօր վավերացված գործարքով «Լիորմանդից» բաժնետոմսերը փոխանցում է «Տաշիրին»: Հավելենք նաեւ, որ Հրազդան-ՋԷԿ-ը հիմնականում աշխատում է որպես պահուստային կայան` ԱԷԿ-ի կանգի եւ էներգիայի ընթացիկ պակասուրդի ժամանակ: 2016 թվականին կայանը մատակարարել է Էլցանցի ստացած էներգիայի շուրջ 7%-ը:

Երեւանում արտակարգ դեպք է տեղի ունեցել: Ոստիկանությունն ահազանգ է ստացել, որ Այգեձորի տներից մեկում տղամարդու դի կա կախված: Դեպքի վայր ժամանած իրավապահները երիտասարդ տղամարդու դի են հայտնաբերել՝ 30-35 տարեկան: Նախնական տեղեկություններով՝ նա Իրանի քաղաքացի է, Հայաստան էր ժամանել որպես զբոսաշրջիկ: Հարեւանները պատմել են, որ տղամարդն այդ տանը բնակվում էր շուրջ երկու շաբաթ: Կասկածելի ոչինչ այդ ընթացքում չեն նկատել. հյուրեր չի ունեցել, լեզու չիմանալով՝ չի էլ հաղորդակցվել հարեւանների հետ:

Երեւան-Սեւան ավտոճանապարհին մահվան ելքով վթար է տեղի ունեցել: «Չայնիի» ոլորանների հատվածում «BMW»-ն բախվել է «ԿԱՄԱԶ»-ին, ինչի հետեւանքով «BMW»-ի ուղեւորները՝ 40-ամյա Կարեն Օզմանյանն ու 28-ամյա Վարինկա Բաբայանը, տեղում մահացել են, մյուս երկու ուղեւորները հիվանդանոց են տեղափոխվել: Պատահարի առիթով քրեական գործ է հարուցվել:

Դոլարն ու եվրոն շարունակում են զիջել դիրքերը: Մարտի 29-ին դոլարի փոխարժեքը կազմել է 483 դրամ, եվրոյինը՝ 522, ռուբլունը՝ 8 դրամ 49 լումա, ֆունտինը՝ 601 դրամ:

Մարտի 30-ին հանրապետությունում սպասվում է առանց տեղումների եղանակ: Օդի ջերմաստիճանը 2-3 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +0+2, ցերեկը՝ +16+18 աստիճան տաքություն: