Մայիսի 18-ին կայանալիք 6-րդ գումարման Ազգային ժողովի անդրանիկ նիստից առաջ խորհրդարանական պաշտոնների հարցը, կարծես, լուծվեց: Այսօր կայացած Հանրապետական կուսակցության Խորհրդի նիստում որոշվել է, որ Ազգային ժողովի նախագահի պաշտոնում առաջադրելու են Արա Բաբլոյանի թեկնածությունը: Փոխխոսնակի թեկնածուներն էլ Էդուարդ Շարմազանովն ու Արփինե Հովհաննիսյանն են: ՀՀԿ խմբակցությունը շարունակելու է ղեկավարել Վահրամ Բաղդասարյանը, քարտուղարը կլինի Գագիկ Մելիքյանը: Հանրապետականը նաեւ առաջարկելու է նախկին 12 մշտական հանձնաժողովների փոխարեն 9 հանձնաժողով ձեւավորել: Այդ դեպքում ՀՀԿ-ին բաժին կհասնի վեց հանձնաժողով:
«Ծառուկյան» դաշինքից ընտրված պատգամավորներին էլ նիստի էր հրավիրել Գագիկ Ծառուկյանը: Այստեղ, ինչպես հայտնի է, ամեն ինչ հարթ չէ: Օրեր առաջ Կենտրոնական ընտրական հանձնաժողովը հայտարարել էր, որ «Ծառուկյան» դաշինքից պատգամավոր ընտրված 23 մարդ ինքնաբացարկի դիմում է ներկայացրել: Նրանցից 8-ը, սակայն, հաջորդ օրն իսկ հայտարարեցին, որ դա Գագիկ Ծառուկյանի միանձնյա որոշումն է եղել, եւ հետ վերցրեցին ինքնաբացարկի դիմումները: Վարդան Բոստանջյանը, սակայն, հերքել է Ծառուկյանի կողմից ճնշումների մասին լուրերը. փողոցային խոսակցություններ են:
Իսկ Ծառուկյանի որոշման դեմ ըմբոստացած պատգամավորների թվում էր նաեւ Նապոլեոն Ազիզյանը, որն այսօր ասել է, որ չի հրաժարվելու պատգամավորական մանդատից: Լրագրողները, սակայն, հիշեցրել են. ավելի վաղ ասել էր, թե այսօրվա նիստում է որոշվելու մանդատ վերցնել-չվերցնելու հարցը, նաեւ հայտարարել, որ իր մանդատը «մատաղ կանի Ծառուկյանի ոտքերի տակ»: Նորընտիր պատգամավորն արդյունքում փոխել է խոսքի ոճը:
Ինքնաբացարկի դիմումը հետ վերցրած Արարատ Զուրաբյանն էլ դեռ չի որոշել, կվերցնի մանդատը, թե՞ ոչ: Բայց վստահեցրել է, որ Ազգային Ժողովի առաջին նիստին, ամեն դեպքում, կմասնակցի: Վաղն էլ կորոշի պատգամավորական մանդատը վայր դնելու հարցը:
ՀՀԿ-ից հեռացած եւ «Ծառուկյան» դաշինքից պատգամավոր ընտրված Վարդան Ղուկասյանից էլ լրագրողները հետաքրքրվել են, թե ինչու է, ի վերջո, հեռացել հարազատ կուսակցությունից: Ասում է՝ ինքը չի հեռացել, կյանքն է իրեն տեղափոխել այս դաշինք: Իսկ ընդհանրապես, Ղուկասյանը ՀՀԿ-ի եւ ԲՀԿ-ի միջեւ տարբերություն չի դնում:
Դաշինքի նիստում նաեւ որոշվել է, որ խորհրդարանական խմբակցությունը ղեկավարելու է Գագիկ Ծառուկյանը: Այստեղ նաեւ որոշել են, որ Ազգային ժողովի փոխնախագահի պաշտոնում առաջադրելու են Միքայել Մելքումյանի թեկնածությունը, երեք թեկնածու էլ ունեն խորհրդարանական խմբակցությունների ղեկավարի համար՝ Նաիրա Զոհրաբյան, Վարդեւան Գրիգորյան, Վարդան Բոստանջյան:
Բայց եթե մշտական հանձնաժողովների թիվը կրճատելու՝ Հանրապետականի առաջարկն ընդունվի, ինչի հավանականությունը մեծ է, «Ծառուկյան» դաշինքին բաժին կհասնի երկու հանձնաժողով, եւս մեկ հանձնաժողովի ղեկավարություն էլ կստանձնի «Ելք» դաշինքը:
«Ելք»-ի խորհրդարանական խմբակցությունն նույնպես այսօր նիստ է գումարել: Խմբակցության ղեկավար է ընտրվել Նիկոլ Փաշինյանը, քարտուղար՝ Գեւորգ Գորգիսյանը: Ամենայն հավանականությամբ, «Ելք»-ը նաեւ մեկ մշտական հանձնաժողովի նախագահ կունենա:
Իսկ Ազգային ժողով անցած պաշտոնյաներն այսօր մեկը մյուսի հետեւից ազատվել են աշխատանքից: Վարչապետի որոշմամբ՝ ՄԻԵԴ-ում Հայաստանի կառավարության լիազոր ներկայացուցչի պաշտոնից ազատվել է Գեւորգ Կոստանյանը: Նա պատգամավոր է ընտրվել ՀՀԿ-ի ցուցակով:
Սերժ Սարգսյանի հրամանագրերով էլ պաշտոնից ազատվել են նախագահի խորհրդական Ալիկ Սարգսյանը, նախագահի վերահսկողական ծառայության ղեկավար Ֆելիքս Ցոլակյանը, արդարադատության նախարար Արփինե Հովհաննիսյանը: Վարչապետի որոշմամբ, արդարադատության նախարարի պարտականությունները ժամանակավորապես կկատարի նախարարի առաջին տեղակալ Արթուր Հովհաննիսյանը:
Մարտական դիրքում պայմանագրային զինծառայող է զոհվել: Այսօր առավոտյան՝ ժամը 10:30-ի սահմաններում, Հայաստանի պաշտպանության նախարարության զորամասերից մեկի մարտական դիրքում մահացու հրազենային վիրավորում է ստացել պայմանագրային զինծառայող Գրիշա Վարդանի Կարապետյանը: Քննչական կոմիտեն քննություն է սկսել՝ Կարապետյանի վիրավորում ստանալու հանգամանքները պարզելու համար:
Այս գիշեր հակառակորդը կրկին ակտիվ է եղել ղարաբաղա-ադրբեջանական զորքերի շփման գծում: Հայկական կողմը պատասխան գործողությունների է դիմել եւ կորուստներ պատճառել հակառակորդին: Արցախի պաշտպանության բանակը գործողության տեսագրությունն է ներկայացրել: Ադրբեջանական կողմը գիշերը հրադադարի ռեժիմը խախտել է շուրջ 60 անգամ: Այս անգամ նույնպես, հրաձգային զինատեսակներից բացի, հակառակորդն ականանետեր եւ հակատանկային նռնականետ է կիրառել:
Վանաձորում արտակարգ դեպք է տեղի ունեցել: Քաղաքով անցնող Տանձուտ գետում տղամարդու դի են հայտնաբերել: Փրկարարները գետից դուրս են բերել տղամարդու մարմինն ու հագուստի գրպանում անձնագիր գտել: Դրա տվյալների համաձայն՝ ջրահեղձ եղած քաղաքացին Վանաձորի 79-ամյա բնակիչ Զավեն Խաչիկի Գալստյանն է:
Էրդողանի այցը Վաշինգտոն ցույցերի եւ բախումների առիթ է դարձել: ԱՄՆ-ում Թուրքիայի դեսպանի նստավայրի մոտ բազմաթիվ մարդիկ են հավաքվել՝ բողոքելու Ռեջեփ Թայիփ Էրդողանի այցի դեմ: Էրդողանի կողմնակիցները հարձակվել են ցուցարարների վրա: 9 մարդ լուրջ վնասվածքներ է ստացել: Տուժածներից մեկը Հայաստանից է, ազգությամբ եզդի, մյուսները քրդեր են: Բախումների արդյունքում 2 մարդ է ձերբակալվել: Վաշինգտոնի ոստիկանության ներկայացուցիչը տեղեկացրել է, որ նրանցից մեկին ոստիկանի վրա հարձակման մեղադրանք է առաջադրվել: Առայժմ հայտնի չէ, սակայն, արդյո՞ք ձերբակալվածների մեջ բախում հրահրած Թուրքիայի նախագահի թիկնապահներ կան:
Ամերիկայի քրդական, հունական ու ասորական կազմակերպությունները բողոքի ակցիայի էին դուրս եկել՝ ուշադրություն հրավիրելու Թուրքիայում Էրդողանի վարչակազմի բռնաճնշումների ու երկրի սահմաններից դուրս իրականացվող ագրեսիայի ուղղությամբ: Ցուցարարներին նաեւ ամերիկահայեր են միացել:
Ամերիկյան արժույթը շարունակում է թուլանալ, իսկ եվրոն հաստատուն քայլերով ամրապնդում է դիրքերը: Արդյունքում մայիսի 17-ին դոլարի փոխարժեքը կազմել է 483 դրամ, եվրոյինը՝ 536, ռուբլունը՝ 8 դրամ 52 լումա, ֆունտինը՝ 626 դրամ:
Մայիսի 18-ին հանրապետության հյուսիսային շրջաններում սպասվում է անձրեւ եւ ամպրոպ: Օդի ջերմաստիճանը 2-3 աստիճանով կբարձրանա, իսկ հետո 4-5 աստիճանով կնվազի: Երեւանում նույնպես տեղումների հավանականություն կա: Մայրաքաղաքում գիշերը կդիտվի +10+12, ցերեկը՝ +26+28 աստիճան տաքություն: