Երեւանի Մյասնիկյան պողոտայում հուլիսի 23-ին թիվ 20 երթուղին սպասարկող «ԳԱԶելի» վթարից տուժած 7 քաղաքացիներից 4-ը դուրս են գրվել Երեւանի «Սուրբ Գրիգոր Լուսավորիչ» բժշկական կենտրոնից: Այս մասին այսօր՝ հուլիսի 24-ին, NEWS.am-ի հետ զրույցում ասաց հիվանդանոցի Վերակենդանացման բաժանմունքի վարիչ Սամվել Կարապետյանը: Նա նշեց, որ իրենց մոտ այժմ բուժում է ստանում 3 քաղաքացի, որոնք ունեն տարբեր վնասվածքներ: Նրանց վիճակը գնահատվում է միջին ծանրության:
Ավելի վաղ տեղեկացրել էինք, որ հուլիսի 23-ին, խոշոր ավտովթար է տեղի ունեցել. ժամը 19:50-ի սահմանում Մյասնիկյան պողոտայում՝ «Արքայաձոր» ռեստորանային համալիրի մոտ, թիվ 20 երթուղին սպասարկող «ԳԱԶել» մակնիշի 3069 Տ համարանիշի միկրոավտոբուսի վարորդը կորցնելով մեքենայի կառավարումը բախվել է էլեկտրասյանը, վթարի հետեւանքով 7 հոգի մարմնական վնասվածքներով տեղափոխվել են «Սուրբ Գրիգոր Լուսավորիչ» բժշկական կենտրոն: