ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է Արգենտինայի ԶԼՄ-ների լուրերը՝ այդ երկրում ռուսական դիվանագիտական առաքելության միջոցով թմրամիջոցների մատակարարման սխեմայի բացահայտման մասին, հաղորդում է ՌԲԿ-ն:
Զախարովայի խոսքով` խոսքը ռուսական եւ արգենտինյան իրավապահ մարմինների համատեղ գործողության մասին է, որի արդյունքում խափանվել է Արգենտինայից կոկաինի մեծ խմբաքանակի մատակարարումը եվրոպական շուկա:
Նա նշել է, որ գործողության արդյունքում ձերբակալվել են կասկածյալներ`երկու պետությունների քաղաքացիներ: Նրանց նկատմամբ այժմ հետաքննություն է ընթանում:
«Բեռը, որի մասին նշվում է, հայտնաբերվել է մեկ ու կես տարի առաջ Բուենոս Այրեսում Ռուսաստանի դեսպանատան օժանդակ շենքերից մեկում` դպրոցական համալիրում: Ինչպես պարզվել է, այն պատկանել է շտապ աշխատանքային պայմանագրով գործուղումն ավարտած տեխնիկական կազմի աշխատակցին», - նշել է Զախարովան:
Նա պարզաբանել է, որ Բուենոս Այրեսում ՌԴ դեսպան Վիկտոր Կորոնելիի նախաձեռնությամբ եւ Կենտրոնի հետ համաձայնեցմամբ կասկածելի բովանդակությամբ պայուսակների հայտնաբերման մասին տեղեկատվությունը փոխանցվել է Արգենտինայի իրավապահ մարմինների ղեկավարությանը: Նախարարության ներկայացուցիչը չի բացահայտել գործողությունների մանրամասները` նշելով միայն, որ «ձեռք բերված արդյունքը մեզ թույլ է տալիս մատակարարման ուղու խափանման մասին արձանագրել»:
Ինչ վերաբերում է մամուլում հայտնված այն շահարկումներին, որ այդ բեռը կարող էր ուղարկվել դիվանագիտական ուղիներով, մենք ուզում ենք նշել, որ նման մոտեցումը ցույց է տալիս դիվանագիտական փոստի ուղարկման մեխանիզմի եւ կարգի անտեղյակության մասին, որի բովանդակությունն իհարրկե ներկայացուցչության տեխնիկական անձակազմը չի որոշում», — ասել է Զախարովան: