Արցախում ստեղծված իրավիճակը կարելի է բաժանել երկու մասի: Այս մասին NEWS.am-ի հետ զրույցում ասաց Արցախի Հանրապետության նախագահի մամուլի խոսնակ Դավիթ Բաբայանը:
«Հասարակական տեսանկյունից իրավիճակը չափազանց հանգիստ է ինչպես միշտ: Որեւէ արտառոց բան չկա, ժողովուրդն ապրում է բնականոն կյանքով: Վիճակը լրիվ հանդարտ է:
Ինչ վերաբերում է քաղաքական տեսանկյունից իրավիճակին նայելուն, ապա մենք մտնում ենք հետաքրքիր ու ակտիվ մի ժամանակաշրջան: Դա պայմանավորված է նրանով, որ քաղաքական կյանքում նոր զարգացումներ են լինելու»,-ասաց Դավիթ Բաբայանը՝ չցանկանալով ավելի մանրամասնել, թե ինչպիսի զարգացումներ են լինելու:
Հարցին, թե արդյոք այդ զարգացումների համատեքստում պետք է դիտարկել Արցախի պետնախարար Արայիկ Հարությունյանի հրաժարականը, նա արձագանքեց. «Ժամանակը ցույց կտա»:
Դավիթ Բաբայանը տեղեկացրեց, որ այս պահի դրությամբ դեռ Արայիկ Հարությունյանի հրաժարականի դիմումը ստորագրված չէ, իսկ հիմքերի մասին կխոսի ինքը՝ Արայիկ Հարությունյանը:
Ավելի վաղ NEWS.am-ը հայտնել էր, որ Արցախի Հանրապետության պետական նախարար Արայիկ Հարությունյանն այսօր՝ հունիսի 6-ին, աշխատանքից ազատվելու մասին դիմում է ներկայացրել Արցախի նախագահ Բակո Սահակյանին:
Դիմումում, մասնավորապես, գրված է. «Հիմք ընդունելով Արցախի Հանրապետության Սահմանադրության 93-րդ հոդվածի 4-րդ կետի պահանջները՝ խնդրում եմ Ձեզ ազատել ինձ Արցախի Հանրապետության պետական նախարարի պաշտոնից»:
Արայիկ Հարությունյանը կներկայացնի իր դիմումի հիմքերը այսօր, ժամը 15:00-ին տեղի ունեցող մամուլի ասուլիսի ժամանակ:
