Իրանը Թրամփի պաշտոնավարման ընթացքում բանակցություններ չի վարի ԱՄՆ-ի հետ: Այս մասին հայտարարել է Իրանի կառավարության մամուլի քարտուղար Մոհամմադ Բաքեր Նոբախտը, փոխանցում է Fars-ը: «Նման մարդու (Թրամփի) հետ բանակցելու հիմքեր չկան, մենք այժմ բանակցում ենք Եվրոպայի հետ»,- Թեհրանում լրագրողների հետ զրույցում ասել է Նոբախտը:
Նոբախտի մեկնաբանությունը հնչեցվել էր այն բանից հետո, երբ մի շարք իրանցի ռեֆորմիստներ կիրակի օրը Թեհրանի բարձրաստիճան պաշտոնյաներին հասցեագրված նամակ էին ստորագրել` պահանջելով ուղիղ բանակցություններ սկսել ԱՄՆ-ի հետ` տարբեր հարցերի շուրջ առկա առճակատումը լուծելու համար: «Մենք մեր ազգային անվտանգության վերաբերյալ բանակցություններ չենք տանում, այդպիսի մարդու հետ բանակցելու հիմքեր չկա», - հավելել է Նոբախտը:
Նրա խոսքով՝ Թրամփի՝ Իրանի միջուկային համաձայնագրից դուրս գալու որոշումը ԱՄՆ-ի նկատմամբ վստահության լուրջ ճգնաժամի է հանգեցրել:
