Առաջիկա օրերին արդեն ԵՏՄ Մրցակցության եւ հակամենաշնորհային կարգավորման հարցերով դեպարտամենտը կքննի հայկական «Տարոն Ավիա» ավիաընկերության գործը: Այս մասին NEWS.am-ին տեղեկացրեց ՀՀ Տնտեսական մրցակցության պաշտպանության պետական Հանձնաժողովի նախագահ Արտակ Շաբոյանը:
Տեղեկացնենք, որ «Տարոն Ավիան» դիմել էր ՏՄՊՊՀ՝ դժգոհելով ռուսական օդանավակայանների տարբերակված գնային քաղաքականությունից: Ըստ բողոքի, ոչ ռուսական ավիաընկերությունների համար սահմանված են կայանման եւ այլ ծառայությունների ավելի բարձր գներ, ինչը հնարավորություն չի տալիս, որպեսզի հայկական ավիաընկերությունը իր գնային քաղաքականությամբ մրցակցի ռուսականների հետ:
«Քանի որ խոսքը վերաբերում է ոչ ռեզիդենտ ընկերությունների վարքագծին, այսինքն գործ ունենք անդրսահմանային շուկայի հետ, հետեւապես ՀՀ Մրցակցային մարմինը չի կարող օպերատիվ կերպով տիրապետել անհրաժեշտ բոլոր ինֆորմացիային՝ լիարժեք ուսումնասիրություն իրականացնելու համար»,-նշեց Ա. Շաբոյանը:
Ըստ Մրցակցային մարմնի ղեկավարի, նախնական ուսումնասիրություններով պատկերն այնպիսին է, որ ավիաընկերությունների համար օդանավակայաններում ոչ հավասար պայմանների ստեղծումը հակասում է ԵՏՄ–ում առողջ մրցակցության սկզբունքներին ու կանոններին. «Մենք պատրաստ ենք եւ հետեւողականորեն անելու ենք օրենսդրության սահմաններում առավելագույնը՝ այդ խնդրի լուծման համար: Կարծում ենք, որ տնտեսվարողների շահերը ԵԱՏՄ անդամ բոլոր երկրների տարածքում պետք է լինեն հավասարապես պաշտպանված: Այս խնդրի լուծումն, անշուշտ, կարող է կարեւոր դեր խաղալ հայկական ավիաընկերությունների զարգացման գործում, ինչին մենք փորձելու ենք հասնել՝ մեր գործընկերների հետ համագործակցության արդյունքում»,–ասել է Շաբոյանը։