Եվրոպական ընտրություններում Եվրոպական ժողովրդական կուսակցությունից (ԵԺԿ) Եվրահանձնաժողովի նախագահի գլխավոր թեկնածու Մանֆրեդ Վեբերը հայտարարել է, որ Թուրքիան չի կարող դառնալ Եվրոպական միության անդամ, տեղեկացնում է MIGnews-ը։
Նա հավելել է, որ պատրաստվում է դադարեցնել անդամակցության բանակցությունները, եթե դառնա Եվրահանձնաժողովի նախագահ։ Թուրքիան հայտարարում է, որ ԵՄ-ին անդամությունն իր գլխավոր ռազմավարական նպատակներից մեկն է, թեեւ անդամակցության բանակցությունները, որոնք պաշտոնապես սկսվել են 2004 թվականին, փակուղի են մտել եւ ձգձգվում են երկար տարիներ։
ԵԺԿ-ից Եվրահանձնաժողովի նախագահի աջ կենտրոնամետ թեկնածու Վեբերը մայիսին Եվրախորհրդարանի ընտրություններից հետո Բավարիայի գերմանացի պահպանողականներին ասել է. «Բոլորը լավ հարաբերություններ են ուզում Թուրքիայի հետ, բոլորը ցանկանում են աշխատել նրանց հետ»։
«Բայց եթե ես դառնամ Հանձնաժողովի նախագահ, ես կհանձնարարեմ Բրյուսելի գրասենյակներին դադարեցնել Եվրոպական միություն մտնելու մասին բանակցությունները Թուրքիայի հետ։ Թուրքիան չի կարող դառնալ Եվրոպական միության անդամ, եկեք պարզաբանենք սա»,- հավելել է Վեբերը։
Հոկտեմբերին Թուրքիայի նախագահ Ռեջեփ Թայիփ Էրդողանն ասել էր, որ Թուրքիայի՝ ԵՄ մտնելու խնդիրները կապված են մուսուլմանների հանդեպ նախապաշարմունքների հետ։