ԱՄՆ-ը Չինաստանից, Վրաստանից, Թուրքիայից եւ Մալայզիայից ընկերություններ ու կազմակերպություններ է ներառել «սեւ ցուցակում»։

Բայդենի վարչակազմը հայտարարել է, որ առեւտրային սահմանափակումներ է մտցրել չինական ավելի քան 30 հետազոտական ինստիտուտների եւ կազմակերպությունների դեմ՝ մարդու իրավունքների խախտումների եւ տեխնոլոգիաների ենթադրյալ մշակումների համար, ինչպիսիք են «ուղեղի վերահսկման» զենքը, որոնք խաթարում են ԱՄՆ ազգային անվտանգությունը:

Առեւտրի նախարարությունը Չինաստանի ռազմաբժշկական գիտությունների ակադեմիային եւ նրա 11 գիտահետազոտական ինստիտուտներին մեղադրել է «վերջնական օգտագործողների եւ չինացի զինվորականների նաեւ ուղեղի վերահսկման ենթադրյալ զենքերի աջակցության համար» կենսատեխնոլոգիաներ օգտագործելու մեջ:

Առեւտրի նախարարությունը եւս չորս չինական կորպորացիաներ է ներառել իր կազմակերպությունների ցանկում՝ Չինաստանի բանակի արդիականացման գործում նրանց դերի համար, ինչը հակասում է ԱՄՆ ազգային անվտանգությանը եւ արտաքին քաղաքականության շահերին: Գերատեսչությունը նաեւ ավելացրել է հինգ այլ չինական ընկերությունների, որոնք իբր «ձեռք են բերել կամ փորձել են ձեռք բերել տեխնոլոգիաներ Միացյալ Նահանգներում, որպեսզի օգնեն արդիականացնել ժողովրդաազատագրական բանակը»:

Առեւտրի նախարարությունը նաեւ միջոցներ է ձեռնարկել Վրաստանում, Մալայզիայում եւ Թուրքիայում տեղակայված կազմակերպությունների դեմ, որոնք «վերաուղղորդել կամ փորձել են վերաուղղորդել ամերիկյան ապրանքները Իրանի ռազմական ծրագրերին»: «Մասնավորապես, այս կազմակերպությունները այն ցանցի մի մասն են, որն օգտագործվում է Իրանին ամերիկյան ծագման ապրանքներ մատակարարելու կամ մատակարարել փորձելու համար, որոնք, ի վերջո, նյութական աջակցություն կցուցաբերեն Իրանի պաշտպանական արդյունաբերությանը՝ խախտելով ԱՄՆ արտահանման վերահսկողությունը»,- ասվում է ծանուցման մեջ:

Ընդհանուր առմամբ, առեւտրի նախարարությունը միջոցներ է ձեռնարկել Չինաստանում երեսունչորս, Վրաստանում երեք, Մալայզիայում մեկ եւ Թուրքիայում երկու կազմակերպությունների դեմ։