Երեւանի Խորենացու փողոցի թիվ 47 շենքի 6–րդ հարկի բնակարաններից մեկում երեք օր առաջ բռնկված հրդեհի հետեւանքով Այրվածքաբանության ազգային կենտրոն տեղափոխված պացիենտի վիճակը շարունակում է ծայրահեղ ծանր մնալ։ Այս մասին NEWS.am-ի հետ զրույցում ասաց կենտրոնի բուժգծով փոխտնօրեն Կարինե Բաբայանը։
«Պացիենտի վիճակը ծայրայեղ ծանր է, շնչառական խնդիրներ ուներ, երեկ միացվել է արհեստական շնչառության սարքին։ Նա ունի 4–րդ աստիճանի այրվածք՝ բոցով, շնչուղիները նույնպես այրվել են, ունի նաեւ զուգակցող հիվանդություններ»,– ասաց Այրվածքաբանության ազգային կենտրոնի փոխտնօրենը։
Նշենք, որ հունվարի 7-ին, Երեւանի Խորենացու փողոցի թիվ 47 շենքի 6-րդ հարկի բնակարաններից մեկում հրդեհ էր բռնկվել։ Հրդեհը մարվել էր ժամը 00։53-ին։ Այրվել էր 6–րդ հարկի բնակարաններից մեկը՝ գույքով եւ 7-րդ հարկի բնակարաններից մեկի պատուհանների շրջանակները (մոտ 18 քմ)։
Փրկարարները շենքից տարահանել էին 28 քաղաքացու, բնակիչներից Ռ. Ս.-ն (ծնված 1946 թ․) հոսպիտալացվել էր Այրվածքաբանության ազգային կենտրոն ՓԲԸ, նրա վիճակը գնահատվել էր ծայրահեղ ծանր։ Հրդեհի հետեւանքով «Մուրացան» հիվանդանոցային համալիր էր տեղափոխվել նաեւ Մ. Տ.-ն (ծնված 2019 թ․)՝, որտեղ տուժածի առողջական վիճակը գնահատվել էր բավարար։ «Մուրացան» հիվանդանոցից մեզ փոխանցեցին, որ երեխան դուրս է գրվել։