Լոռիի մարզի առաջին ատյանի ընդհանուր իրավասության դատարանը պատժից ազատել է իր նորածին երեխայի սպանության մեջ մեղադրվող վանաձորցի կնոջը: Խոսքը չորս երեխաների մայր 45-ամյա Զիրավարդ Ստեփանյանի մասին է, ով հունվարի 7-ին տան լոգարանում ծննդաբերել էր 5-րդ երեխային եւ նորածնին ապօրինաբար կյանքից զրկելու դիտավորությամբ` փաթաթել նրան պոլիէթիլենային փաթեթում ու խեղդամահ արել: Այնուհետեւ նա փաթեթը թաքցրել էր լոգարանի անցքի մեջ: Լոգարան մտած եւ հատակին արյան հետքեր տեսած սկեսրոջ հարցին էլ պատասխանել էր, թե հիվանդացել է կանացի հիվանդությամբ: Նույն օրն առողջական վիճակի կտրուկ վատթարացման պատճառով տեղափոխվել էր հիվանդանոց, որտեղ բացահայտվել էր ծննդաբերության փաստը:
Դատարանը արագացված կարգով օրերս քննության է առել սույն միջադեպի առթիվ հարուցված քրեական գործը եւ մեղավոր է ճանաչել մանկասպան մորը ՀՀ ՔՕ 106 հոդվածով` մանկասպան մորը դատապարտելով 3 տարի ազատազրկման: Գործով մեղադրողը Ստեփանյանի պատասխանատվությունն ու պատիժը ծանրացնող հանգամանքներ չի նշել, իսկ որպես մեղմացուցիչ հանգամանք վկայակոչել է առաջին անգամ հանցանք կատարելը, խնամքի տակ 4 անչափահաս երեխա ունենալը եւ հանցանքի համար զղջալը: «Չէի ուզենա տենց բան անել, բայց թե անգիտակից եմ եղել, չեմ հասկացել՝ ինչ եմ արել: Խնդրում եմ՝ ինձ ներեք»,- ասել է մեղադրյալը: Դատարանը միեւնույն ժամանակ կիրառել է ՀՀ ազգային ժողովի 2011թ. հունիսի 20-ի համաներման մասին որոշումը եւ ազատել նրան պատժի կրումից՝ վերացնելով նաեւ քննիչի կողմից նշանակված խափանման միջոցը՝ ստորոգրություն չհեռանալու մասին:
Նշենք, որ Զարիվարդ Ստեփանյանն իր արարքը հիմնավորել է` նշելով ծանր սոցիալական պայմանները, որոնցում ապրում է նրա ընտանիքը: