Մենք լիարժեք բավարարված չենք ՀՀ զինվորական դատախազ Գրիգոր Էլիզբարյանի հետ հանդիպումից: Այս մասին այսօր՝ մարտի 30-ին, լրագրողների հետ զրույցում ասաց Ազատ գյուղում զինվորական կացարանի ողբերգական հրդեհից մահացած զինծառայողներից Գագիկ Բարսեղյանի հայրը՝ Արման Բարսեղյանը:
Նշենք, որ այսօր ողբերգական հրդեհից մահացած զինծառայողների ծնողները հանդիպել են զինդատախազի հետ:
«Ամբողջը քննչական գործողության փուլում է, գաղտնիք է, չենք կարող բացահայտել: Հույս ունենք, որ գործը ճիշտ ուղղությամբ է գնում: Հարցերը տվել ենք, դրանց շրջանակներում քննություն է ընթանում, նախաքննական գաղտնիք ես չեմ կարող հայտնեմ: Մենք լիարժեք բավարարված չենք հանդիպումից»,- պատասխանեց զինծառայողի հայրը:
Նշենք, որ գործով տուժող ճանաչված ծնողները դժգոհ են եւ՛ վարույթն իրականացնող մարմնից, եւ՛ պետական կառույցներից: Նրանց ներկայացուցիչ, փաստաբան Նորայր Նորիկյանը դեպքի հանգամանքները պարզելու նպատակով մի քանի տասնյակ գրություններ է ուղարկել տարբեր կառույցների, սակայն պատասխանները ծնողներին չեն գոհացրել:
Հիշեցնենք, որ հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետեւանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երեւան՝ Այրվածքաբանության ազգային կենտրոն:
Դեպքից անմիջապես հետո առաջին նախնական վարկածն առաջ է քաշել Փաշինյանը, հայտարարելով, թե սպան բենզին է լցրել վառարանի վրա, ինչից հետո, երբ կրակն իրեն է անցել, «ինքնապաշտպանական բնազդով» բենզինի 5 լիտրանոց տարան նետել է կացարանի ուղղությամբ, ինչն էլ հրդեհի պատճառ է դարձել։
Դեպքի առնչությամբ նախաձեռնվել է քրեական վարույթ՝ մի քանի հոդվածով: Գործով մեղադրյալի կարգավիճակ ունի հինգ սպա, որոնցից երեքը կալանքի տակ են:
