Իրանի պաշտպանության նախարարությունը հայտարարել է, որ «ամերիկա-սիոնիստական թշնամին» պետք է ճանաչի իրանական ազգի օրինական և անվիճելի իրավունքները, հակառակ դեպքում նրան սպասվում են կրկնվող պարտություններ ինչպես դիվանագիտական ճակատում, այնպես էլ մարտի դաշտում:

Ինչպես հայտնում է Press TV-ն, համապատասխան հայտարարությամբ Թեհրանում հանդես է եկել պաշտպանության նախարարության պաշտոնական ներկայացուցիչ, բրիգադային գեներալ Ռեզա Թալաի-Նիկը:

«Առանց այդ ողջամիտ և վերջնական իրավունքների ապահովման, թշնամին չի կարողանա դուրս գալ այն ճահճից, որում հայտնվել է»,- հայտարարել է Թալաի-Նիկը:

Ըստ նրա՝ Իրանը, հենվելով ժողովրդական աջակցության վրա, բարձր ներուժ է ցուցադրել ինչպես մարտական գործողություններում, այնպես էլ դիվանագիտության մեջ: «Եթե թշնամին չզիջի Իրանի օրինական պահանջներին դիվանագիտության մեջ, նա պետք է սպասի ռազմական ասպարեզում իր անցյալի պարտությունների կրկնությանը»:

Թալաի-Նիկը նշել է, որ թշնամու նոր պարտությունների անխուսափելիությունը կանխատեսելի է՝ ելնելով տարածաշրջանի իրողություններից: Նա նաև ընդգծել է, որ թշնամու ցանկացած նոր սպառնալիք, ագրեսիա կամ խախտում կարժանանա վճռական, վերջնական և ջախջախիչ պատասխանի:

«Հակամարտության գոտուց ամերիկյան նավերի և ռազմածովային նավերի բազմակի փախուստը դրսևորում է մեր երկրի զինված ուժերի՝ ինչպես ԻՀՊԿ-ի, այնպես էլ Բանակի վճռականությունն ու հնարավորությունները. նրանք լիովին պատրաստ են տալու ցանկացած ագրեսիայի պատասխան, որը կստիպի զղջալ արարքի համար»: