Ամենօրյա հոգածություն և շոշափելի արդյունքներ. Հայէկոնոմբանկն ու Զինվորի տունը ներկայացնում են մեկամյա նախաձեռնության արդյունքները: 

2025թ. Բանկի տարեկան ժողովին կորպորատիվ պատասխանատվության շրջանակում հայտարարվեց Զինվորի տան հետ կարևոր ծրագրի մեկնարկի մասին, որի համար հատկացվեց 50 մլն դրամ: Ծրագիրը 2 հիմնական բաղադրիչ ուներ. առաջինը կրթական ծրագիր էր զինհաշմանդամների համար՝ Բանկում աշխատանքի անցնելու հնարավորությամբ, իսկ երկրորդ բաղադրիչն ուղղված էր Զինվորի տան թողունակության մեծացմանը՝ ստացիոնար բուժման հնարավորությունների ավելացմամբ։ 

Կրթական ծրագրի շրջանակում՝

  • շուրջ 30 շահառու անցել է ընդհանուր 93 ժամ տևողությամբ մասնագիտական վերապատրաստում, որը ներառել է օտար լեզուների, համակարգչային հմտությունների, «փափուկ» հմտությունների (soft skills) դասընթացներ և բանկային գործի վերաբերյալ սեմինար-քննարկումներ,

  • 14 մասնակից հետաքրքրված է եղել Բանկում աշխատանքի անցնելու հնարավորությամբ,

  • 7 մասնակից հաջողությամբ ներգրավվել է պրակտիկայի ծրագրում,

  • 4 շահառու շարունակել է վճարովի ստաժավորումը Բանկի Գլխամասային գրասենյակում և մասնաճյուղերում,

  • նոր հաստիքների առկայությանը զուգահեռ՝  ծրագրի մասնակիցների ներգրավումը Բանկի թիմում շարունակվելու է:

Ենթակառուցվածքների բարելավման շրջանակում՝

  • ամբողջացվել և կարգավորվել է շենքի հակահրդեհային համակարգը՝ որպես կարևոր անվտանգության բաղադրիչ, 

  • արդիականացվել է 6 տոննա տարողությամբ ջրի ռեզերվուարի ամբողջական համակարգը, փոխարինվել է շենքի ջեռուցման և տաք ջրի համակարգի գլխավոր պոմպը,

  • կենտրոնի վիրաբուժական և վերականգնողական  բաժանմունքները համալրվել են նորագույն բժշկական սարքավորումներով և գործիքներով,

  • ձեռք է բերվել Hongqi մակնիշի էլեկտրական ավտոմեքենա, որը ծառայում է շահառուների կարիքներին,

  • իրականացվել են լայնածավալ նորոգման և կառուցապատման աշխատանքներ:

«Այս ծրագիրը Զինվորի տան հետ Հայէկոնոմբանկի առաջին համագործակցությունն էր, և կարճ ժամանակահատվածում արձանագրել ենք իրապես շոշափելի արդյունքներ: Մենք առանձնակի ուշադրությամբ և հոգածությամբ ենք իրականացրել այս ծրագիրը՝ կարևորելով հայրենիքի պաշտպանների համար առավել անվտանգ ու հարմարավետ միջավայրի ձևավորումը, ինչպես նաև նրանց մասնագիտական ինտեգրումն ու կայուն աշխատանքով ապահովումը», - նշում է Հայէկոնոմբանկի Գործադիր տնօրենի գործառնական գծով տեղակալ Վահե Ղազարյանը: 

Իր հերթին, Զինվորի տան տնօրեն Հայկուհի Մինասյանը, անդրադառնալով ծրագրի կարևորությանը, նշում է. «Հայէկոնոմբանկի շնորհիվ Զինվորի տունը կարողացավ լուծել երկարաժամկետ խնդիրներ: Թե՛ կրթական, թե՛ վերանորոգման և թե՛ մյուս հարցերը, որ լուծում ստացան Բանկի աջակցության շնորհիվ՝ էական փոփոխություններ են ենթադրում զինհաշմանդամների կյանքում և Զինվորի տան աշխատանքներն առավել որակյալ կազմակերպելու հարցում: Պատերազմից այսքան տարի անց սոցիալական նման մեծ պատասխանատվությունը բացառիկ երևույթ  է»:

86 86 | aeb.am

Հայէկոնոմբանկը վերահսկվում է ՀՀ Կենտրոնական բանկի կողմից: