Նախընտրելի
Ուկրաինայի նախագահ Վլադիմիր Զելենսկին խոստացել է, որ Ուկրաինան պատասխանելու է իր էներգետիկայի վրա ռուսական հարվածներին։
«Ուկրաինան սովորել է հնարավորություններ գտնել՝ արժանիորեն պատասխանելու ռուսական հարվածներին։ Ես դա չեմ համեմատում այն հումանիտար աղետների հետ, որոնք նրանք այսօր կազմակերպում են։ Ուկրաինան նման բան չի անում։ Բայց, այնուամենայնիվ, Ուկրաինան ի վիճակի է պատասխանելու Ռուսաստանին նրանց ցանկացած գործողության համար»,- ասել է Զելենսկին ուրբաթ ամերիկացի քաղաքական մեկնաբան Ֆարիդ Զաքարիայի հետ զրույցում։
«Ռուսաստանը գիտի, որ եթե նրանք հարվածեն, իսկ նրանք ձմռանը պատրաստվում են հարվածել մեր էներգետիկ համակարգին, Ռուսաստանը կստանա նույնը,- շարունակել է Ուկրաինայի նախագահը։- Եթե նրանք մեզ համար բլեքաութներ կազմակերպեն, մենք կփորձենք նրանց արժանիորեն պատասխանել»։
Միաժամանակ Զելենսկին ընդգծել է, որ Ուկրաինան միշտ պատրաստ է խաղաղ բանակցությունների և պատերազմի ավարտին։
«Իսկ եթե Ռուսաստանը չի ցանկանում ավարտել, ապա պետք է գործընկերների միջոցով մոտեցում գտնել նրա նկատմամբ։ Եթե դա դժվար է գտնել, ապա այսօր գոնե պետք է քայլ առ քայլ առաջ շարժվել։ Ապաշրջափակել Սև ծովը և հնարավորություն գտնել էներգետիկ հրադադարի համար»,- ասել է Զելենսկին։
